976 Бардыгы /

БИШКЕК. Президент Сооронбай Жээнбеков Кыргыз Республикасынын Шайлоо жана референдумдарды өткөрүү боюнча борбордук комиссиясынын (БШКнын) төрайымы Нуржан Шайлдабекованы кабыл алды.Анын жүрүшүндө өлкөнүн парламентинин жана жергиликтүү Кеңештердин депутаттарын шайлоого даярдыктардын жүрүшү кызуу талкууланды.

Мамлекет башчысы шайлоо мыйзамдарына ылайык, шайлоонун жүрүшүнүн толук ачык-айкындуулугун, шайлоо кампаниясына бардык саясий партиялардын катышуусун жана аларга бирдей шарттарды түзүүнү  камсыздоо зарылдыгын белгиледи. Сооронбай Жээнбеков ошондой эле жергиликтүү Кеңештерге шайлоолордун алдында айрым шаарларда жарандарды массалык каттоо боюнча жакында болгон окуяны эске салып, шайлоо жараянын айрым субөектилеринин мындай кадамдарына тынчсыздануусун ачыктады. Буга карата тиешелүү мамлекеттик органдардын ыкчам реакциясын канааттануу менен белгиледи. БШК ар дайым мындай фактыларга өз убагында жооп кайтарып, ал эми укук коргоо органдары тиешелүү укукту баасын бериши керектигин баса белгиледи.

Президент Сооронбай Жээнбеков алдыдагы жергиликтүү Кеңештерге шайлоо мамлекеттик органдардын парламенттик шайлоону өткөрүүгө даярдыгы кандай экенин текшерүү болуп саналаарын белгиледи. Буга байланыштуу алардын толук ачык-айкындуулугун камсыздоо зарылдыгына дагы бир жолу токтолду. БШК төрайымы Нуржан Шайлдабекова жергиликтүү Кеңештердин депутаттарын шайлоону кынтыксыз өткөрүүгө бардык даярдык иш-чаралары өлкө мыйзамдарына ылайык өтүп жаткандыгын кошумчалады. Саясий партиялардын шайлоо мыйзамдарынын негизги принциптери тууралуу кабардар болуусун жогорулатуу максатында өлкө аймактарында тиешелүү семинарлар өткөрүлгөндүгүн дагы кошумчалады. Ошондой эле шайлоо мезгилинде мыйзамдуулукту камсыз кылуу жана мыйзам бузууларга каршы аракеттерди көрүү маселелери боюнча укук коргоо органдарынын катышуусунда аймактарда жыйындар өткөрүлгөндүгүн маалымдады. Белгиленгендей, алдыдагы шаарлардагы жергиликтүү Кеңештерге шайлоолорго жыйырма эки саясий партиянын катышуусу өлкөбүздөгү шайлоо жараянынын атаандаш жана демократиялуу болушунун нукура күбөсү.

Ошондой эле Кыргыз Республикасынын «Жергиликтүү Кеңештердин депутаттарын шайлоо жөнүндө» мыйзамына кабыл алынган түзөтүүлөргө ылайык, 25 айылдык Кеңешке аялдар үчүн 30 пайыздан кем эмес мандатты резервдөө колдонулат. Ал алдыдагы шайлоолордо жергиликтүү Кеңштерде аялдардын катышуусун 38 пайызга чейин көьбөйтүүгө негиз жаратат. Айылдык Кеңештерге бардыгы болуп 375 депутат шайланат, алардын 142 мандаты аялдарга тийээри күтүлүүдө.

Алишер ТОКСОНБАЕВ, өз кабарчы