1,048 Бардыгы /

АКШнын президенти Дональд Трамп коронавируска каршы күрөшүүдө өнөр жайды мобилизациялоо үчүн аскердик ыйгарым укуктарды өзүнө алды. Чечим пандемиянын терс кесепеттери күчөп жаткан учурда кабыл алынды.

Трамп өзүн “жоокерчилик замандын президенти” деп атап, 1950-жылы кабыл алынган Коргонуу өндүрүшү жөнүндөгү мыйзамды колдонду. Корей согушу маалында кабыл алынган бул мыйзамга ылайык, президент ишканаларды өндүрүштү кеңейтүүгө жана жашоо үчүн эң керектүү болгон материалдарды чыгарууга мажбурлай алат. Учурда бул – респираторлор, беткаптар, жасалма дем алдыруучу аппараттар жана башка коронавируска каршы каражаттар.

Трамп вируска байланыштуу АКШда кырдаал начарлап кетсе гана бул мыйзамды колдоно турганын билдирди. Ал “Твиттердеги” баракчасына: “Буга зарылчылык жаралбайт деп үмүттөнөм”, – деп жазды.

Трамп коронавируска каршы күрөштү Экинчи дүйнөлүк согуш учурунда кабыл алынган чаралар менен салыштырып, жалпы улуттук курмандыктар болушу мүмкүн экенин эскертти.

АКШда COVID-19 вирусу 9 миңден ашуун кишиге жугуп, 155 адам өмүр менен кош айтышты. Илдеттин жайылышына каршы туруу үчүн Кошмо Штаттар виза берүүнү токтотту.

18-мартта Оксфорд университетинин окумуштуулары коронавирусту 30 мүнөттө аныктай турган анализди иштеп чыгышканын билдиришкен. Бул арада Пастер институту вирусту 10 мүнөттө аныктоочу жана баасы 1 доллар турган анализдин үстүндө иштөөдө. Бул тууралуу Би-Би-Си маалымдады.

АКШ жана Израилде вируска каршы вакцина тесттен өтүүдө. Бирок ал ийгиликтүү жүзөгө ашкан күндө да базарга кийинки жылы чыгышы мүмкүн. Орусия менен Британия да өз алдынча вакцина ойлоп табуу аракетинде.

Бул арада бүгүн, 19-мартта коронавирус алгачкы жолу чыккан Кытайдын Хубэй провинциясында илдетке чалдыкан учур катталган жок.

Дүйнө жүзү боюнча инфекцияны 220 миңге чукул киши жуктуруп алды, алардын 84 миңден ашууну айыкты, 9 миңге чукул адам көз жумду.

www.