1,061 Бардыгы /

ТАЛАС.  2020-жылдын 23-мартында КР Акыйкатчынын Талас облусундагы өкүлчүлүгү мониторинг иш жүргүзүштү.

Акыйкатчы өкүлчүлүгү маалымдагандай, Премьер-министрдин буйругу менен короновируска каршы күрөшүү боюнча түзүлгөн облустук штаб күнү-түнү жана дем-алыш күндөрү дагы иштеп жатат.

Эпидемологиялык иш-чаралардын алкагында, Талас районунун Талды-Булак айылында жайгашкан, Талас-Бишкек автотрассында, ошондой эле “Чоң-Капка” чек ара постунда санитардык-эпидемологиялык посттор коюлган.

Акыйкатчы өкүлчүлүгү беткап жана антисептик каражаттары жетиштүүлүгүн билүү үчүн Талас ш. дарыканаларына мониторинг кылышты. Байкоолордон улам, “Неман-Фарм” жана “Лекарь” (К. Нуржанов көч. жайгашкан), “Көктөм” (Бердике баатыр көч), “Улукман-ата”(Оторбаев жана Сарыгулов көч. кесилишинде) медициналык беткаптар жана марли жок экени, а антисептик каражаттар 110 сомдон сатылып жатканы анык болгон.

Ошол эле учурда базардын кире беришинде жайгашкан дарыканада бет каптын бир даанасы 30 сомдон сатылып жаткан. Кымбат сатылып жатканынын себебин фармацевттер өндүрүшчүлөрдөн бир даанасын 25 сомдон сатып алып жатканы менен түшүндүрүштү.

Азык-түлүктүн жетиштүүлүгү боюнча, Акыйкатчынын Талас облусундагы өкүлчүлүгү маалымдагандай, азык-түлүк дүкөндөр жана дарыканалар, ошондой эле жер-жемиш жана азык-түлүк сатылган базардын бир бөлүгү кадимкидей эле режимде иштеп жатат. Ажиотаж, сатып алуучулар тарабынан нааразычылыктар жана зарыл азык-түлүктөргө болгон баанын өсүшү байкалбайт. Өнөр-жай, курулуш товарларын саткан дүкөндөр убактылуу жабылган.

Дарыканалардагы антисептик каражатка болгон баанын кымбаттап кетиши, ошондой эле беткаптын жоктугу боюнча Акыйкатчы өкүлчүлүгү Талас облусунун тийиштүү органдарына кайрылуу жөнөттү.

“Аймак”