32 жаштагы журналист «Улут, раса, аймак жана дин аралык кастыкты козутуу» беренеси боюнча айыпталууда. Эгер ал күнөөлүү деп табылса, беш жылга чейин эркинен ажыратылышы мүмкүн.

Тажик Башкы прокуратурасынын маалыматына караганда, Шарифов 2013-2019-жылдар аралыгында диний кастыкты козуткан экстремисттик мүнөздөгү 200дөн ашык макала жарыялаган. Бирок мекеменин пресс-релизинде кеп кайсыл макалалар тууралуу болуп жаткандыгы жазылган эмес.

Буга чейин эл аралык Human Rights Watch жана Amnesty International укук коргоо уюмдары, ошондой эле Журналисттерди коргоо комитети (CPJ) Далер Шарифовду колдоп чыгышкан. Алар бийликти тергөө аяктаганга чейин журналистти үй камагына чыгарууга, ишти объективдүү иликтөөгө жана сөз эркиндигин кепилдеген бардык нормаларды сактоого чакырышкан.

Мындан тышкары тажик журналисттери менен коомдук активисттер да кесиптешин колдоп, «Фейсбук» социалдык түйүнүндө #FreeDaler хэштеги менен флешмоб башташкан. Тажик журналисттеринин европалык конгресси менен блогерлердин биргелешкен кайрылуусунда Шарифовдун камалышы мыйзамсыз экени жазылып, ал макалаларында коомдогу радикализмдин алдын алууга аракет кылганы белгиленген. Алардын айтымында, журналист дин темасында сабаттуу болгондуктан, дайыма экстремизм менен терроризмге каршы чыгып келген.

Далер Шарифов мурда мамлекеттик «Сафина» телеканалында эмгектенген. Акыркы жылдары ишкерлик менен алектенип, бирок расмий түрдө эч жерде иштеген эмес. Ал социалдык түйүндөргө жарыялаган сынчыл көз караштагы макалалары менен белгилүү.