Дээрлик 12 саатка созулган жыйын түн ортосунда аяктап, жаңжал менен коштолду. «Оппозициялык платформа – Жашоо үчүн» фракциясы мыйзам долбооруна каршы чыгып, парламенттин ишин үзгүлтүккө учуратууга аракет жасады, ал эми Украинанын президенти Владимир Зеленский Радага эки сапар келип, депутаттарды документке “макул” деп добуш берүүгө үндөдү. Мыйзам долбоору добушка коюлганга чейин депутаттар документке киргизилип жаткан төрт миңден ашуун өзгөртүүлөрдү карап чыгууга үлгүрүштү.

Жыйынтыгында жер сатуу жөнүндөгү мыйзам 259 добуш менен кабыл алынды. Добуштардын көбүн – 206сын президенттин “Эл кызматчысы” фракциясы камсыздады.

Кабыл алынган мыйзамга ылайык, жер сатуу рыногу 2021-жылдын 1-июлунда ишке кирет. 2024-жылга чейин жерлерди физикалык жактар гана сатып алат, бир кишиге 100 гектардан ашык берилбейт, кийин лимит 10 миң гектерга чейин көтөрүлөт жана юридикалык жактар да же сатып алуу укугуна ээ болот.

Ошол эле маалда мамлекеттик жерди менчиктештирүүгө тыюу салынат, эгер кийинчерээк өткөрүлө турган жалпы элдик референдумда украиналыктардын көбү макулдугун билдирсе, чет өлкөлүк жарандарга да жер сатып алуу мүмкүнчүлүгү берилет. Жерди офшордук компаниялар жана Орусия жарандарынын башкаруусундагы юридикалык жактар сатып ала албайт.

Айыл чарба багытындагы жер рыногун ачууну Эл аралык валюта фонду жана бир катар европалык кредиттик компаниялар колдогон. Алар бул демилгени реформага карай алдыга бир кадам таштоо деп эсептешет. Буга чейин эгер мыйзам долбоору кабыл алынса, Украинага жалпысынан 10 миллиард доллар насыя бөлүнүшү ыктымал экени кабарланган.