Укук коргоочулардын 6-апрелде жарыялаган кайрылуусунда 16-марттан тартып өлкөдө өзгөчө абал жарыялангандан бери элге өз оюн эркин билдирген 32 активист кармалганы айтылат. 17 киши административдик айып пулга жыгылып, же эскертүү алган. Алар казак бийлиги пандемияга карабай, саясий атаандаштарын куугунтуктоону улантып жатат деп эсептешүүдө.

Укук коргоочулар пандемия шартында камактагылар үчүн вирус жугузуп алуу коркунучу жогору экенин белгилешип, саясий жүйөлөр менен кармалган кишилерди шарттуу түрдө мөөнөтүнөн мурда бошотууну өтүнүштү.

Казакстандык укук коргоочулар кайрылууну БУУнун Адам укуктары боюнча жогорку комиссарына, Европа Кеңешине, Европа парламентине, ЕККУга, Бүткүл дүйнөлүк саламаттык сактоо уюмуна жана чет өлкө элчиликтерине жөнөтүштү.

Казакстанда өзгөчө абал учурунда камактагылар менен туугандарынын жолугушууларына тыюу салынган. Бийлик түрмөлөрдө дезинфекция иштери жүрүп, беткап кийүү режими киргизилгенин билдирген.

Казакстандык укук коргоочулар болсо колонияларда карантин эрежеси сакталбай жатканын, соттолуучулар менен кызматкерлерде баткап, жеке коргонуу каражаттары, ал гана эмес парацетамол тартыш экенин айтышууда.

Казакстанда вирус жуктурган кишилердин саны 7-апрель күнү саат 14:00гө карата 685 кишиге жетти.

WWW.