«Биз азыртан бул пандемиядан кийин эмне кылабыз деп ойлоно башташыбыз керек. Экономикабыз төмөндөп, 2008-жылдагы каржы каатчылыгынан оорураак болушу мүмкүн. Азыр өкмөт биринчи кезекте калкты азык-түлүк жана дары-дармек менен камсыз кылууга көңүл бурушу зарыл», — деди Назарбаев.

6-апрелде өлкөнүн бир нече шаарында социалдык жардам алуу үчүн чогулган адамдар көп болгону, алардын карантин эрежесине ылайык аралыкты сактабай жатканы айтылган. Мындан тышкары кезек күткөндөрдүн ортосунда мушташ чыкканы да кабарланган. Алматыда жаалданган адамдар «Казпочтанын» имаратына кирип барууга аракет кылышкан.

Казак өкмөтү марттын аягында коронавирустун айынан жумушунан же бизнесинен айрылган жарандарга атайын жөлөк пул төлөп берүүнү убадалаган.

Акыркы маалыматтар боюнча Казакстанда коронавирус жуктуруп алган адамдардын саны 697ге жетти. Алардын ичинен алты киши каза болуп, 51 айыкты.