Февралда коронавирус пандемиясына байланыштуу дүйнөдө мунайга болгон суроо-талап кескин төмөндөгөн. Мындан улам март айында ОПЕКтин башында турган Сауд Арабиясы өндүрүштү азайтууну сунуш кылган. Бирок уюмга кирбеген Орусия мындай демилгени колдобой койгондуктан, мунайдын дүйнөлүк баасы кескин төмөндөп кеткен.

Апта башында Орусиянын президенти Владимир Путин Москва өнөктөштөр менен ОПЕК+ механизминин алкагында макулдашууга даяр экенин билдирген. «Азыр кеп өндүрүш көлөмүн суткасына 10 миллион баррелге азайтуу жөнүндө болушу мүмкүн. Бардыгы өнөктөштүк негизде болушу керек», — деген Путин.

РБК басылмасы өз булактарына таянып, Москва жаңы келишимге ОПЕКтен тышкары жалпысынан суткасына 70 миллион баррель мунай өндүргөн АКШ, Бразилия, Норвегия, Канада жана Мексика өңдүү башка өлкөлөр да кошулат деп күтүп жатканын жазды.

АКШнын президенти Дональд Трамп бул тууралуу журналисттердин суроолоруна жооп берип жатып, өлкө мунай өндүрүшүн азайтпай турганын айткан.

«Биз өндүрүштү буга чейин азайтканбыз, азыр базарга ылайык иш алып баруудабыз», — деген ал.

Өткөн жумада Трамп эгер Эр-Рияд менен Москва мунай өндүрүшүн азайтуу боюнча мунаса таппаса, Вашингтон мунай импортуна кошумча салык киргизерин эскерткен.

WWW.