30-мартта Казакстандын өкмөтү вируска каршы күрөшүп жаткан медиктерге кошумча сыйакы киргизген. Бул медицина кызматкерлеринин нааразылыгын жаратып, алар күн сайын бейтаптар менен иштеген бардык дарыгерлер кошумча акы алышы керектигин билдиришүүдө.

Нур-Султандагы аты-жөнүн билдиргиси келбеген тез жардам кызматкерлеринин бири карантин мөөнөтү узартылгандан кийин коронавирус жуктурган бейтаптар менен иштей турган он бригада түзүлгөнүн, кошумча төлөмдү ошолор гана аларын билдирди.

​«Биз мындай чечимге макул эмеспиз. Азыр жумуш кыйла көбөйдү. Ар бир бригада 18дей чакырууну тейлейт. Кээ бирде дене табы жогорулаган бейтаптардан коронавирус аныкталып жатат. Демек биз деле бул илдетке каршы күрөшүп жатабыз», — деди ал.

Өткөн жумада Актөбө жана Караганды шаарларындагы тез жардам кызматкерлери да ушундай талап менен чыгышкан.

Казакстанда 1341 киши коронавирус жуктуруп алганы аныкталды. Алардын ичинен 16сы каза болуп, 240 киши айыгып чыкты.