1,144 Бардыгы /

АКШ бийлиги Кытай коронавирустун жайылуу масштабын жана анын канчалык деңгээлде корунучтуу экенин жашырып, коргонуу каражаттары менен медициналык препараттарды чогултуп алган деген шектенүүлөрдү четке каккан жок.

Бул тууралуу Associated Press агенттиги АКШнын Ички коопсуздук министрлигинин ички баяндамасына таянуу менен билдирди.

Документ 1-майда даярдалган. Анда Кытай вирустун канчалык деңгээлде коркунучтуу экенин жашырып, ошол эле маалда медициналык товарлардын импортун көбөйтүп, экспортун кыскартканы айтылат.

3-майда АКШнын мамлекеттик катчысы Майк Помпео жаңы коронавирус Кытайдагы лабораториядан чыкканын далилдеген «фактылар абдан көп» экенин билдирген. Ал жекшембиде «ABC News» телеканалына интервью берип, Бээжин COVID-19 жараткан коркунуч тууралуу маалыматты өз убагында айтпай, жаап жашырган деп сындап, «Кытай Компартиясы дезинфомациясы үчүн жооп берет» деген. Ага чейин президент Дональд Трамп бул вирус Ухандагы лабораториядан тараганын айтып, Кытай бийлиги менен катар Дүйнөлүк саламаттык сактоо уюмун да айыптаган.

Кытайдын англис тилинде чыккан «Global Times» басылмасы дүйшөмбү күнү Помпеонун дооматына комментарий берген. Анда мамкатчынын колунда вирустун Ухандан чыкканын көргөзгөн эч кандай далилдери жок экени айтылат.

«Трамптын администрациясы үгүт өнөктүгүн улантууда жана пандемияга каршы аракеттерге тоскоол болууда» деп жазды гезит.

Ушул тапта дүйнө жүзүндө үч жарым миллиондон ашуун киши вирус жуктуруп алды, 248 миң адам көз жумду. Анын ичинде АКШда 68 миңден көп киши өмүр менен кош айтышты.

WWW.