1,280 Бардыгы /

Нур-Султан Өзбекстандагы Сардоба суу сактагычынан аккан суу Казакстандагы айылдарды каптагандыгына байланыштуу Ташкентке нота жөнөтпөйт. Бул тууралуу 5-майда Казакстандын Тышкы иштер министрлигинин (ТИМ) басма сөз катчысы Айбек Смадияров билдирди.

Буга чейин өлкөнүн экология, геология жана жаратылыш ресурстары министринин орун басары Сергей Громов чек арадагы гидротехникалык курулуштар тууралуу Өзбекстандан толук маалымат талап кылган нота даярдалганын билдирген. Ал Сардоба суу сактагычы казак тараптын макулдугусуз курулганын да белгилеген.

«Суу каптоонун кесепетин жоюуда өкмөттөр менен чектеш аймактардын жетекчилиги тыгыз иштешип жатканын эске алуу менен Казакстандын өзбек тарапка нота жөнөтүү маселеси жок», — деди басма сөз катчы.

2017-жылы курулуп бүткөн Сардоба суу сактагычынын дамбасы 1-майда таңга жуук жырылып кеткен. Ошол эле күнү кечинде Казакстандын чек арага жакын айылдарын суу каптай баштаган.

5-майда Түркстан облусунун акими Умирзак Шукеев аймактагы 14 айылдын 36,6 миңден ашык тургуну коопсуз жерге эвакуацияланганын билдирген. Анын айтымында, 2-майда техногендик мүнөздөгү өзгөчө кырдаал жарыяланган Мактаарал районунда беш айыл суу алдында калды. Мындан тышкары дагы жети айылды суу каптоо коркунучу бар.

Ал ортодо Түркстан облусундагы суу каптаган Женис айылынын тургундары аларды башка жерге көчүрүп, үй куруп берүүнү талап кылып жатышат. Жергиликтүү жашоочулардын айтымында, Женис Казакстандагы суу каптаган биринчи айыл болгон. Андагы курулуштардын көбү жараксыз абалга келип, түшүмдү суу жууп кеткен.

WWW.