1,358 Бардыгы /

Дамбанын жырылышынан жапа чеккен Сырдарыя облусуна Өзбекстандын бардык аймактарынан жардам жөнөтүлүүдө. Бирок кайрымдуулук өз дарегине жетпей калган учурлар көп катталып жатат.

Сырдарыя облусунун Акалтын районунун тургуну Хасанбой Шерматов 1-майда коопсуз жайга көчүрүлүп, 6-майда үйүнө кайтып келген. Анын айтымында, үй-бүлөсү соңку эки күндөн бери кошуналары берген тамак-аш менен азыктанууда.

– Мен маале комитетине барып, кайрымдуулук үчүн жөнөтүлгөн азык-түлүктөн берүүнү сурадым. Бирок баары түгөнүп калганын айтышып, эч нерсе беришкен жок. Президент элдин камын көрүүгө чакырып жатса, алар бизди муктаждыкка мажбурлашууда. Дагы жакшы, кошуналарыбыз бар. Кошуналарымдын бири калама, экинчиси дагы башка азык-түлүк алып келип берди, – деди ал.

Акалтын районунун акимчилигинде иштеген кызматкерлердин бири кайрымдуулукка келген товарлар чыныгы муктаждарга жетпей калып жатканын тастыктады:

– Күн сайын прокуратура жана администрация кызматкерлери кайрымдуулук үчүн келген азык-түлүктөн түшкү тамак жасап берүүгө мажбурлап жатышат. Мен акимдин орун басарынын уулу жеке машинеси менен келип, кампадагы азык-түлүктөн жүктөп кеткенин көрдүм. Биздин райондо жардамга муктаждар көп. Бирок кайрымдуулук үчүн келген азык-түлүктөр өз дарегине жетпей калып жатат.

Акалтын районунун акиминин биринчи орун басары Олим Абдуллаев кайрымдуулукка келген азык-түлүктөрдүн уурдалып жатканы тууралуу маалыматтарды четке какты. Ал бул маселени прокуратура көзөмөлдөп жатканын билдирди.

Расмий маалыматтар боюнча Сардоба суу сактагычында дамба жырылгандан кийин Акалтында 44 миңдей киши коопсуз жайга көчүрүлгөн. 7-майга карата алардын 41 миңден ашууну үйлөрүнө кайтып келди.

Өзбекстандын Каржы министрлиги кырсыктын кесепеттерин жоюу үчүн Сырдарыя облусуна 100 миллиард сум (9,8 миллион доллар) бөлөрүн маалымдаган.

WWW.