1,132 Бардыгы /

Беларуста өздөрүн оппозициячыл партия деп атаган «Беларус элдик фронту» жана солчул маанайдагы «Адилеттүү дүйнө» партиялары алдыдагы президенттик шайлоого катышуудан баш тартышты.

«Илдетке чалдыккандардын саны кыйла аз катталган Европа өлкөлөрү шайлоолорду кийинкиге жылдырып жаткан чакта, пандемия күч алган Беларуста шайлоо өткөрүү өтө кооптуу», — деп билдирди «Беларус элдик фронту».

Солчул күчтөрдүн өкүлдөрү шайлоо өткөрүү чечимин «кылмыш» деп аташты. «Коронавирус инфекциясы тездик менен жайылып жаткан шартта жакынкы үч айда шайлоо өткөрүү көптөгөн адамдарын ден соолугу менен өмүрүн тобокелдикке салат», — деп жазылган «Адилеттүү дүйнөнүн» борбордук комитетинин билдирүүсүндө.

Буга чейин «Азаттык» радиосунун беларус кызматы президенттик шайлоого бирдиктүү талапкер чыгарууну пландап жаткан беш оппозициялык партия коронавирустан улам аймактардагы «праймеризди» токтотушканын кабарлаган.

Өткөн жумада Беларус парламентинин төмөнкү палатасы кезектеги президенттик шайлоону быйыл 9-августка белгилеген. Өлкөнү 1994-жылдан бери башкарып келаткан Александр Лукашенко бул шайлоодо талапкерлигин коерун билдирген.

Акыркы маалыматтар боюнча Беларуста коронавирус жуктургандардын саны дээрлик 23 миңге жетип, 131 бейтап каза болду.

www.