1,820 Бардыгы /

Бүгүн, 14-майда Жалал-Абад шаарынын соода жайларында санитардык талаптардын сакталышын көзөмөлдөө аракеттери улантылды.

Рейд Стройпарк соода борборунан башталып, “Береке” базарында жана ири курулуш соода түйүндөрүндө улантылды. Ага шаардын вице-мэри Болот Узакбаев жана тийиштүү мекеме кызматкерлер катышты.

Мында басымдуу азык-түлүк саткан соода орундарындагы сатуучулар тарабынан белгиленген санитардык эрежелер толук кандуу сактабай жаткандыгы белгилүү болду. Айрым дүкөндөрдөн кире беришине илинүүчү эскертме барактары  жок абалда,  кардарларга соода кылып жаткан учурлар кезикти. Рейддин жыйынтыгында буга чейин эскертүү берилген ишкерлердин үчөөсүнө айып пул салынды.

 “Мындан 3 күн мурун шаар мэринин буйругу менен жумушчу топ түзүлдү. Буга өзгөчө абалдын шаар аймагынан алынып, элдин массалык  түрдө көчөгө чыгышы себеп болду. Анын натыйжасында түшүндүрүү иштерин жүргүзүү биздин негизги талап болду. Ага ылайык, ири соода жайларында тагыраагы эл көп жүргөн түйүндөргө барып түшүндүрүү иштерин жүргүзүп жатабыз. Бизден сырткары дагы 5-6 топ күн сайын ушул жаатта иш алып барышууда. 3 күндөн бери катуу киришип, көзөмөл күчөтүлгөнгө буйруса өзгөрүүлөр бар. Санитардык нормаларды сактаган жарандарыбыз көбөйүптүр, албетте сактабагандары да болуп жатат. Эскертүү берилгенине карабай эрежелерди бузгандарга 1000 сомдон 7500 сомго чейин айып жагы каралган. Негизи биздин максат, аларды айыпка жыгуу эмес, ошол ишкерлер аркылуу оору таркап кетпөөсүнүн алдын алуу. Бүгүн 30га жакын ишкерге эскертүү берилип, үчөөсүнө айыппул салынды” – дейт Болот Узакбаев, Жалал-Абад шаарынын вице-мэри.

Бүбүсара ОРОЗАЛИЕВА, “Аймак”