885 Бардыгы /

АКШнын мамлекеттик катчысынын Түштүк жана Борбор Азия боюнча биринчи орун басары Элис Уэллс азыркы шартта Тажикстандын калкына коронавирус тууралуу ачык маалымат берилип, журналисттерге басым болбошу керек деп эсептейт.

Бул тууралуу ал 20-майда Брюсселдеги кеңсесинде өткөн онлайн брифингде журналисттердин суроолоруна жооп берип жатып билдирди.

Уэллс коронавирус пандемиясы шартында көз каранды эмес маалымат каражаттарынын иштеши болуп көрбөгөндөй маанилүү экенин белгиледи:

«Биз Тажикстанда көз каранды эмес басылмаларга карата басымдын уланып жатканына тынчсызданып жатабыз. Азыркы шартта ачык маалыматтарга жетүү өтө маанилүү. Каатчылыктан чыгуу үчүн калк эмне болуп жаткандыгы, эмне кылуу керектиги тууралуу ачык маалыматтарга жана фактыларга ээ болушу зарыл».

11-апрелде АКШ жардам катары Тажикстанга 171 миң доллардык азык-түлүк жөнөткөн. 30-апрелде өлкөдө коронавирус бар экени расмий жарыялангандан кийин дагы 866 миң долларлык акчалай жардам берген. 6-майда Кошмо Штаттар коронавируска каршы күрөшүү үчүн Тажикстанга дагы 1,69 миллион доллар бөлгөн..

Акыркы маалыматтар боюнча Тажикстанда 2140 кишинин коронавирус жуктуруп алганы аныкталды. Алардын ичинен 41 бейтап каза болду.

WWW.