1,396 Бардыгы /

Бүгүн, 12-июнь Жалал-Абадда 2010-жылдагы Санпа окуясын эскерүү иш чарасы өттү. Ага жабырлануучулар, Жогорку Кеңештин төрагасы Дастанбек Жумабеков жана жергиликтүү коомчулуктун өкүлдөрү катышты. Эскерүү учурунда Санпада каза болгондорго арнап тургузулган эстеликке гүл коюлуп, маркумдарга куран түшүрүлдү.

Төрага Дастанбек Жумабеков өз сөзүндө июнь окуясы эч качан унутулбай тургандыгын белгиледи: “Июнь окуясы арадан 10 же 100 жыл өтсө да унутулбайт. Сиздер жок жерден жакындарыңарды жоготтуңар,көкүрөктө өчпөс так турат.Ушул кылмыш ишти жасагандар боштондукта жүргөн да чыгар, аны сиздердин муң-зарыңар тынч койбойт. Бул жарыктыкта болбосо, тигил дүйнөдө жазасын алат. Ушундай жаман күндөр болбосун жана кайталанбасын”.

Областтык ички иштер башкармалыгынын башчысы Кылычбек Жолдошевдин айтымында, июнь окуясына байланыштуу областта 49 кылмышкерге издөө жарыяланган. Алардын ичинен 32си кармалып, учурда 17 жаран изделип келет. Андан сырткары 32 дайынсыз жоголгон жарандардын 29у аныкталып, 3 жаран изделүүдө. Ал эми 71 белгисиз адамдын сөөгү табылып, анын баарынын өздүгү аныкталган. 

Белгилей кетсек, 2010-жылдын 12-14-июнь күндөрү болгон окуяларда жалпысынан 678 адам жабыркаган. 592 адамга медициналык жардам көрсөтүлгөн. Июнь окуясында жалпы 86 адам каза болуп, анын ичинен төртөө дайынсыз жоголгон. Ал эми Сузактын Топурак-Бел участкасында «Санпа» пахта чыгаруучу заводдун жанында болгон окуяда Бишкек—Ош жолунда бара жаткан жүргүнчүлөргө куралчан топ кол салып, 16 адам өлтүрүлгөн. 2 киши дайынсыз жоголуп, 9 унаа өрттөлгөн.

Бүбүсара ОРОЗАЛИЕВА, “Аймак”