1,443 Бардыгы /

Сузактагы Ош-Бишкек жолун бойлой иштеп жаткан коомдук тамактануучу жайларда санитардык абал начар. Андагы кызматкерлер эрежеде көрсөтүлгөн талаптарды аткарбай иштеп жатат. Биз текшерүүгө алган “Жибек жолу” кафесинде эч кандай эреже сакталган эмес. Ал тургай кызматкерлер камераны көргөндөн кийин гана кол кап, бет кап кийгенине күбө болдук.

Кафе администрациялары да санитардык эрежелерге кайдыгер. Алсак, биз баш баккан тамактануучу жайларда коронавирус пандемиясынын алдын алууга багытталган талаптар көңүл сыртында калган.Тепловизор жок, антисептикалык каражат болгону менен аны колдонууну көзөмөлдөгөн адамды көрбөдүк.

Сузак санитардык-эпидемиологиялык кезөмөлдөө борборунун дарыгери Айнура Жамшитованын айтымында, буга чейин 26 коомдук тамактануучу жайга текшерүү жүргүзүлүп, анын төртөөсүнө айыппул салынган.

“Сузак районунда санитардык эрежелерди сактабаган 58 ишкерге салынган айыппулдун өлчөмү 92 миң сомго жетти. Ал эми Ош-Бишкек жолун бойлой иштеп жаткан кафелерди акыркы жолу мындан 10 күн  мурун текшерүүгө алынган. Арасынан “Мухаммед ажы” кафесине эрежелерди сактабагандыгы үчүн айыппул салынды” – дейт Айнура Жамшитова. 

Эпидемиологиялык көзөмөлдөөчүлөр санитардык нормаларды сактабаган ишкерлердин ишмердүүлүгүн токтото алышпайт. Болгону эскертүү, айып пул салуу менен гана чектелишет.

“Аймак”