723 Бардыгы /

ОШ. Кара-Суу районунда пневмония менен ооруган жарандарга өз убагында медициналык жардам көрсөтүү максатында мобилдик топтор үймө-үй кыдырып жүрүшңт. Бул туурасында Кыргыз Өкмөтүнүн Ош облусундагы ыйгарым укуктуу өкүлү Узарбек Жылкыбаев редакциябызга кабарлады.

Маалыматка караганда, дасыккан медиктерден куралган 11 бригада ушул тапта Кара-Суу районундагы тогуз айылды дыкаат текшеришти.  Алар пневмонияга чалдыккан тургундарды аныктап, оорулуулар болсо, жеринде эле кеп-кеңеш берип жатышат. Мындай иштер дагы бир аптага созулат. Буга улай айыл башчылары эгерде оорунун белгилери байкалса, күндүзгү стационарларга кайрылуу боюнча дагы жердештерине ыкчам маалымат берип жатышат.

Эскерте кетсек, апрель айында дагы Ош облусунун аймагында коронавирус илдетине чалдыккан адамдарды аныктоо үчүн үймө-үй кыдыруу жараяны уюштурулган. Анда 43 айылдан 180 миң жаран медициналык кароодон өтүп, корона вирустун 11 учуру катталган.

Алишер ТОКСОНБАЕВ, кабарчы.