1,110 Бардыгы /

Сузак районунундагы Ленин айылындагы №36-кесиптик лицейдин беш кабаттуу жатаканасы 204 орундуу инфекциялык ооруканага айланууда.

Дал ушул ооруканага Ырыс айыл өкмөтүнүн тургуну 73 жаштагы Маматов Кимсанбай аксакалдын уулу 1975-жылы туулган Алмаз Маматов бир нече күн мурун коронавирус илдетинен каза болгон. Көп элди чогултоо жана белгиленген эрежелерди карманып, аксакал баласына аталган союштун каражатын оорукананын курулушу үчүн тапшырды.

“Менин балам ооруканада 15 күн жатты, дарыгерлер колдон келишинче карады. Балам ошондо “дарыгерлер ушунчалык кейип жатат. Бирок эл кулак салбайт экен” деп айткан. Эрежени сакташыбыз керек экен. Балама атаган соё турган союштун акчасын 50 000 сомду ушул оорукананын курулушуна өткөрүп берейин. Ушул жерде элдер дарыланып,  жакшы болгон сайын сообу балама барып турсун”,-дейт К.Маматов.

Аталган жай толугу менен оңдоп-түзөөдөн өткөрүлүп жатат. Учурда электр зымдарын тартылып, суу түтүктөрү оңдолуп, канализациясы жаңыланууда.

Ал эми Көк-Арт айыл өкмөтүнүн тургуну 70 жаштагы Орозмамат Кыдыралиев аксакал өз каражатынан аталган оорукананын бир бөлмөсүн бүтүрүп берүүдө.

“Азыркы учурда жаш болобу же аксакал болобу кайдыгер караган туура эмес. Мамлекетибиз анын ичинде районубуз ушундай абалда турганда колдон келишинче жардам беришибиз керек. Бул бир бөлмөнү бүтүрүү үчүн алынган материалдарга ылайык каражат жумшалат экен. Аны 43 миң сомдун тегерегинде бүтүрүүгө болот деп эсептедик”,-дейт О.Кыдыралиев.

Оорукана жалпы элдин каржылык колдоосу алкагында бүткөрүлүп жатканын жана бюджеттен каражат бөлүнбөгөн.

Кошумчалай кетсек, учурда өлкөнүн жети областында тең ооруканалардын курулушу башталды. Бул пандемиянын экинчи толкунуна даярдык экени айтылып, курулуш иштеринин тез бүткөрүлүүсү пландалууда.

Акылай КАРАБАЕВА, “Аймак”