1,776 Бардыгы /

ОГПИ – республикабыз үчүн педагогикалык кадрларды белендеген эң эски жана өтө абройлуу жогорку окуу жайы. Быйылкы кабыл алуу комиссиясынын жооптуу катчысы Данияр АПЫЕВ ар бир ЖОЖ өз аталышына гана ылайык кадрларды даярдашы зарылдыгын кабарчыбыз менен маегинде демилгеледи.

-Данияр агай, Ош гуманитардык педагогикалык институту (мындан ары ОГПИ) деле окууга талапкерлерди он лайн режиминде кабыл алып жаткандыр?

-Ооба. Кыргыз тарыхында биринчи жолу талапкерлерди ОГПИге деле он лайн режиминде кабыл алып жатабыз. Алар үйүндө олтурушуп эле экзамен тапшырышып, тапшырмаларды дагы беймарал аткарып жатышат.

-Бирок, онлайн системасынын оош-кыйышы дароо эле байкалгандыр?

-Албетте! Журтчулугубузга дайын, биз, ОГПИ, жалпы жонунан педагогикалык гана кадрларды окутабыз. Демек, башка ЖОЖдор ушул өңүттөгү факлуьтеттерин жана бөлүмдөрүн жоюп, алардын баарын тең бизге гана ыроолошсо, мындан баарыбыз тең эле утмакпыз. Анан калса биздин институт үмүттү дагы толук бойдон актамак.

         Менимче, технологиялык жана техникалык багыттагы адистерди ОшТУ гана даярдасын! Ад эми ОшМУ деле бир өңчөй кесиптегилерди камдаганга бекем ыктасын! Болочок сот, прокурор, юрист, укук коргоо органдарынын кызматкерлерин ОМЮИ окутуп-тарбияласын!

        Ал эми Бишкектеги бир катар ЖОЖдордун Ош шаарындагы чачыранды жайланышкан филиалдарын, ошондой эле Кыргызстандын Түштүк башкалаасындагы ЖОЖдордун коллеж-училищаларын биротоло жоюу кажет! Анткени, биздин максатыбыз акча топтоо эмес, ириде нукура кесип ээлерин камдоо гана болушу кажет!

-Данияр агай, быйылкы онлайн сынагынын ийгилиги эмнеде?

-Байкап жаткандырсыздар. Санариптештирүүжемкорлукту жана окууга тапшыруудагы тааныш-билишчиликти биротоло тыйды. Бирок, менин жеке пикиримде, мугалимдик адистиктерге тапшыргандар мурункудай эле оозеки экзамендерди тапшыруусу кажет! Дегеним, ОГПИ булардын – талапкерлердин кебете-кепширин көрүп, сүйлөө жана жазуу речин дыкаат байкаштырып, эң башкысы билим дараметин деле практика жүзүндө сыноосу абзел! Мындан трагедия жана саясат жасоонун дегеле кажети жок!

        Кепке тарткан: Алишер ТОКСОНБАЕВ, өз кабарчы