2,466 Бардыгы /

Ыктыярчылар кыймылы

Азыркы учурда республикабыздын бардык аймактарында ыктыярчылар кыймылы кулач жайып, алар канчалаган адам өмүрлөрдү сактап жатышкандыгын массалык маалымат каражаттарынан, интернет булактарынан жана социалдык тармактардан окуп, көрүп жатабыз. Алардын дарегине мамлекет башчысы да жылуу сөзүн билдирди.

Ыктыярчылар кыймылы Ноокат районунда да кеңири жайылып, март айылынын бери чарчап-чаалыгышса да бел чечпей иштеп жаткан дарыгерлерге жакындан жардам берип жатышат. Жакында райондун Н.Исанов атындагы айыл аймагында Муктарали уулу Бактыбек, Исакбай уулу Актилек, Назарбек уулу Искак, Адилбеков Бекмырза сыяктуу жаш жигиттерден турган ыктыярчылардын тобу түзүлдү. Алар колунда бар демөөрчүлөргө абалды түшүндүрүп, керектүү коргонуучу кийимдер жана 2 жасалма дем алдыруучу аппарат алдырышты. Транспортту өздөрү уюштурушуп, аймактагы ден-соолугу начар оруулардын үйлөрүнө барышып, деми кысылган адамдарга жасалма дем алдыруу жолу менен жардам берип жатышат. Абалы оор болгондорду ооруканага алып келишет.

Айыл аймактын Күнгөй-Кожоке айылыны тургуну, эмгек ардагери Өсөров Маматжандын айтуусунда Муктарали уулу Бактыбек ар дайым көпчүлүктүн кызыкчылыгы үчүн жүргөн, элдин көйгөйлөрүн чечүүгө жан аябаган айылдагы алдыңкы, демилгелүү жигиттердин бири. Быйыл айылдын имамы Жапаров Бекназар экөө араб демөөрчүлөргө кайрылып, эски мечиттин ордуна заманбап жаңы мечиттин имараты курулушу башталды.

Кийинки учурда анын демилгеси менен Кошчан дарыясынан мыйзамсыз шагыл казып жаткандардын аракетине бөгөт коюлду. Күнгөй-Кожоке айылынын айылдын арыктары талапка ылайык казылып, жылда тартыш болгон суу быйыл үзгүлтүксүз келип жатат.

Бүт дүйнөнү дүрбөлөңгө салган, адамзатты терең ойго салган азыркы оор учур кимдин ким экендигин ого бетер көзгө сайып көрсөтүп койду. Мезгил демейде шайлоо алдында «мен элим үчүн тигиндей кылдым, мындай кыламын!» деп ооз көптүрүп кыйкырып жүргөн

депутаттарыбыздын ушундай кыйын кезеңде өзүнүн жеке керт башын корголоп, коңулга кирип кете тургандыгын, катардагы адамдардын арасында да күндөлүк көр тиричилигинен чыга албагандар бар экендигин далилдеп берди.

Бирок, бизди сыймыктандырган нерсе, уучубуз кур эмес экен, азыркы катаал мезгил өз баатырларын алып чыкты. Алар-өзүнүн ден соолугун тобокелге салган ак халатчан дарыгерлерибиз, кыйналып турганга элге кол сунган ыктыярчыларыбыз. Элдин ден-соолугуна көңүл кош карабаган демилгелүү жаштардын оорулуу адамдарга материалдык жана моралдык жактан жардам берип жатышкан балдарга эл ыраазылыгын айтып жатышат.

Сүрөттөрдө: 1.Муктарали уулу Бактыбек,

2.Исакбай уулу Актилек,

3.Назарбек уулу Искак,

4.Адилбеков Бекмырза

Төлөнбай Абдыразаков, Ноокат району, Н.Исанов айыл аймагы.