1,167 Бардыгы /

Минскте Козлов атындагы электротехникалык заводдун жумушчулары иш ташташты. Бул тууралуу Nexta телеграм-каналы кабарлады.

Буга чейин айрым Телеграм-каналдар Беларустагы бардык ишканалардагы жумушчуларды 11-августтан тартып иш таштоого чакырышкан.

Жалпы улуттук иш таштоонун максаты — «Светлана Тихановскаяны жаңы президент деп таануу, бардык саясий туткундарды бошотуу жана кайрадан таза жаңы шайлоо өткөрүү» экени айтылган.

«Жакында эч кандай саясий, экономикалык өзгөрүүлөр күтүлбөйт. Биз баарынан тажадык, жалпы улуттук иш таштоо жарыялайбыз. Бул нааразылык билдирүүнүн Конституцияда бекитилген жолу. Бул үчүн бизди камакка алышпайт, баарыбызды жумуштан кетирүүгө мүмкүн эмес», — деп жазылган Телеграм-каналдар таратып жаткан билдирүүдө.

10-августта Беларуста президенттик шайлоонун расмий жыйынтыктарына каршы жапырт нааразылык акциялар уланды. Күч органдары баррикадаларды жасоого аракет кылган адамдарды кууп таратуу учурунда бир киши каза болду.

Өлкөнүн Борбордук шайлоо комиссиясы (БШК) жарыялаган болжолдуу жыйынтыктарга ылайык, Александр Лукашенко добуштардын 80,8%, анын негизги атаандашы Светлана Тихановская 10,09% алды. Тихановскаянын штабы расмий жыйынтыктарды тааныбай, БШКга арыз менен кайрылган. Тихановская Боршайкомдо мамлекеттик органдардын өкүлдөрү менен сүйлөшкөндөн кийин өлкөдөн чыгып кетүү чечимин кабыл алганын билдирген. Бүгүн эртең менен анын Литвада экени белгилүү болду.

Президенттик шайоодон кийин башталган массалык нааразылыктар маалында Беларуста жүргөн бир нече журналист, анын ичинде орусиялык басылмалардын кабарчылары байланышка чыкпай калышкан.

Бир суткадан бери «Медуза» басылмасынын журналисти Максим Солопов менен байланыш жок. Кесиптештери ал жекшемби күнү кечинде кармалып, катуу сабалганын айтышууда. Азыр анын кайсыл жерде экени белгисиз. Жергиликтүү укук коргоочулардын айтымында, Солопов Жодино шаарындагы тергөө абагында болушу мүмкүн. Укук коргоо органдары орусиялык журналист тууралуу маалымат берген жок.

Дүйшөмбү күнү кечинде «Орусия бүгүн» маалымат агенттигинин фотокабарчысы Илья Питалев менен байланыш үзүлгөн. Бүгүн түнү «Наша Нива» беларус басылмасынын редактору Егор Мартинович да кармалды.

10-августта Минсктеги нааразылык акцияларды чагылдырып жүргөн «Наша Нива» басылмасынын кабарчысы Наталья Лубневскаянын тизесине желим ок тийип, ооруканага кайрылган.

«МБХ медиа» басылмасы кабарчысы Александр Скрыльниковго көздөн жаш агызчу граната тийгенин билдирүүдө.

WWW.