834 Бардыгы /

Шаршемби күнү Беларуста президенттик шайлоонун жыйынтыктарына нааразы болгон миңдеген жаран төртүнчү түн катары менен акцияларга чыгышты.

Алар мамлекет башчы Александр Лукашенко жеңишке жеткендиги айтылган 9-августтагы президенттик шайлоонун жыйынтыктары бурмаланган деп эсептешүүдө. БШКнын маалыматы боюнча Лукашенко добуштардын 80% ашыгын, анын негизги атаандашы Светлана Тихановская 10% жакынын алган.

12-август күнү кечке жакын Минск метросу коопсуздук максатында бир нече станциялар жабылганын билдирди. Бирок айрым станциялардын жанына нааразы болгон жарандар топтолушту.

«Петровщина» станциясынын жанына чогулгандар жолго чыгып, бир нече жолу Дзержинский проспектисин тосушту. ОМОН аларды улам кууп таратканы менен кайрадан чогулуп жатышты.

«Свобода» радиосунун беларус кызматынын маалыматына караганда, Гомель шаарында кармалган 25 жаштагы жергиликтүү тургун каза болду. Ал 9-августта кармалып, кийин ооруканага жеткирилген. Маркумдун апасы уулунун жүрөгү ооруганын, ал нааразылык акцияларга катышпаганын билдирүүдө.

Шаршемби күнү Беларустун Ички иштер министрлиги демонстранттарга каршы ок атуучу курал колдонулганын биринчи жолу ырастады. Буга чейинки күндөрү акция катышуучуларын таратуу үчүн көздөн жаш агызчу гранаталар, желим октор жана суу бүрккүч автоунаалар колдонулуп келген.

12-августтагы акция катышуучуларынын арасында колдоруна гүл кармаган ак кийимчен аялдар көп болду. Алар күч түзүм кызматкерлеринин зомбулугуна каршылык билдирип, добуштарды кайра эсептөөнү талап кылышты. Мындай акциялар Минск, Витебск жана Могилёв шаарларында өттү.

Шаршемби күнү Беларустун баш калаасында 130дан ашык медицина кызматкери укук коргоо органдарынын зомбулугуна каршы акцияга чыгышты. Медициналык университеттин алдына топтолгон медиктер ак халат кийип, колдоруна гүл кармап чыгышты.

Бул күнү «Свобода» радиосунун беларус кызматынын баяндамачысы Виталий Цыганков кармалды. Аны сабап, андан соң аялы экөөнү милиция бөлүмүнө жеткиришкен.

Беларуста нааразылык акциялар башталгандан бери миңдеген адам кармалып, кеминде 250 активист жараат алды. Жабыркагандардын арасында күч түзүм кызматкерлери да бар.

Александр Лукашенко бул акциялар чет өлкөдөн башкарылып жатканын билдирүүдө.

WWW.