789 Бардыгы /

Үстүбүздөгү жылдын 8 айы ичинде облус аймагында 202 өрт кырсыгы катталып, андан келтирилген материалдык зыян 12 млн. 119 миң 423 сомду түздү. Өрт өчүрүүчү-куткаруучулардын ыкчам аракеттеринен улам 2 атуул жана 91 млн. 194 миң сомдон ашуун материалдык баалуулуктар сакталып калынган.

Бул тууралуу КР ӨКМдин Жалал-Абад облусу боюнча башкармалыгынын Өрт өчүрүү, алдын алуу жана авариялык-куткаруу иштери бөлүмүнүн улук офицери, майор К.Карабеков билдирди.

Жогоруда катталган өрт кырсыктары негизинен электр жабдыктарын колдонууда эрежелердин бузулушунан 73 өрт, мештерди колдонууда эрежелердин бузулушунан 14 өрт, отко этиятсыздык менен мамиле кылуудан 26 өрт, жаш балдардын от менен ойноосунан 28 өрт, автоунааларды пайдаланууда өрт коопсуздук эрежелеринин бузулушунан 12 өрт келип чыккан.

Ал эми жалпы өрт кырсыктарынан 132 өрт (жалпы өрт кырсыгынын 65,3 % түзөт) турак-жай секторунда, 25 өрт автоунаада, 14 өрт ачык аймакта, 7 соода жайларда, 8 чарба обьектилеринде, балдар бакчасында 1 жана 7 кампада катталган.

Өткөн 2019-жылдын ушул мезгилине салыштырмалуу өрт кырсыгынын саны 35,3 % азайган, өрттөн келтирилген материалдык зыян 94 % азайган. Тактап айтканда, 2019-жылдын ичинде 312 өрт кырсыгы катталып, өрттөн келтирилген материалдык зыян 202 млн. 503миң 866 сомду түзгөн.

ӨКМдин Жалал-Абад облусу боюнча башкармалыгы райондук, шаардык бөүмдөрү менен биргеликте облус аймагындагы чарбалык обьектилерде жана турак-жай секторунда өрткө каршы иш-чараларды жүргүзүп келүүдө.

КР ӨКМдин Жалал-Абад облусу боюнча башкармалыгы эскертет!

Урматтуу Жалал-Абад облусунун тургундары жогорудагыдай өрт кырсыктарын алдын алуу, адам өлүмдөрүн, жарат алууларын болтурбоо максатында күнүмдүк турмушта, электр жабдууларын колдонууда, автоунаа менен жүрүүдө жана турак жайларда өрт коопсуздук эрежелерин сактаңыздар. Өрт кооптуу мезгилде тоолордогу, жайыттардагы, ачык аянттардагы, жол четтериндеги куураган чөптөрдөгү өрт кырсыктарын алдын алуу максатында күнүмдүк турмушта ачык отту пайдаланууда, тамеки тартууда өрт коопсуздук эрежелерине өзгөчө көңүл буруп сактоону эскертебиз!

“Аймак”