1,260 Бардыгы /

Жалал-Абад облусунун башчысы Нурболот Мирзахмедов Аксы районунун Кызыл-Бейит айылына барды

Аталган тоо арасындагы шарты катаал айылда жашаган тургундар Нарын дарыясы аркылуу каттамдарды кайык менен жүргүзүп келет. Буга чейин мындагы жалгыз техниканын эскилиги жетип, айыл  жашоочуларынын район менен болгон байланышына бир топ кыйынчылык жаралып келген. Эми түйшөлткөн маселе жеңилдеп, 500 миң сомго жаңы мотордук кайык (паром) жасалып тапшырылды.

Ага сарпталуучу каражаттын  350 миң сомун  “Ориел Голд”  алтын изилдөөчү компаниясы берсе, 100 миң сомун жергиликтүү айыл өкмөтү жана  жашоочулар көтөргөн. Өкүл айыл элинин суу үстүндөгү  каттам жүргүзүүсүнө бардык коопсуздук чараларын эске алуу керектигин айтып, зарыл болгон   куткаруучу кийимдер менен камсыздаарын билдирди.

Бул айылда 1980-жылга чейин жол каттамы болгон. Кийин Күрп-Сай ГЭСи курулганда Нарын дарыясы бөгөлүп, кургак жол менен баруучу каттам суу астында калган. Ал ортодо  айыл элин 1985-жылы көчүрүү маселеси каралып, Ноокен районунун Үч-Там айылынан чек бөлүнгөн. Бирок ал жактын шартына канааттанбаган айылдыктар баруудан баш тартышкан.

Облус жетекчиси жергиликтүү жашоочулар менен жолугуп, көйгөйлөрүн укту.  Мындагылар айылда эң эле башкы маселе жайыт, ички жол, электр энергиясы менен катар интернет байланышынын жоктугун айтышты.  Өкүл маселелердин үстүндө жергиликтүү бийлик менен  биргеликте тийиштүү иштер жүрөөрүн айтты.

Кызыл-Бейит айылында 72 кожолук болуп, 389 адам жашайт. Мындагы тургундар мал чарбачылыгы менен гана алектенишет. Мектеп жашындагы балдар Таш-Көмүр жана Кара-Көл шаарларына каттап билим алышат. Айыл Аксы районунун борборунан 150 чакырым алыстыкта жайгашкан.

“Аймак”