765 Бардыгы /

2020-жылдын жыйынтыгы менен жалпысынан 60 мектептин курулушу жана капиталдык ремонту аягына чыгат. Бул тууралуу премьер-министр Кубатбек Боронов 1-октябрдагы брифинг учурунда билдирди.

Анын айтымында, республикалык бюджеттин эсебинен 53 мектеп курулууда. Алардын ичинен 14ү коррупция менен күрөшүүнүн жыйынтыгында кайтарылган каражаттардын эсебинен бүткөрүлдү. Дагы 4 объектини Саудия өнүктүрүү фонду каржылады.

«2020-жылы 97 мектеп үчүн мамлекеттик бюджеттен 958 млн сом каралган, анын ичинен 748 млн сому бөлүндү. 110 млн сом Бирдиктүү депозит эсебинен алынып, 3 объектини чыгымдары толугу менен төлөндү. Бул 1,5-2 миңге чейин окуучулар окуй турган өтө чоң мектептер. Дагы Саудия өнүктүрүү фондунун 30 млн сомуна мектептер салынып жатат», – деди Боронов.

Премьер-министр Кубатбек Боронов 5-октябрда шайлоодон кийин мектептер толук дезинфекция болуп, 6-октябрдан тарта 2-6-класстын окуучулары да окуй баштарын да билдирди.

Ал мугалимдер жана окуучулар санитардык талаптарды сактоого милдеттендирилип, айрым сабактарды таза абада өткөрүү сунушталганын айтты:

«Сабак өтүүдө бир топ өзгөчөлүктөр болот. Климаттык шарттарды эске алуу менен турмуш-тиричилик коопсуздугу, мекен таануу, адеп, дене тарбия сабактарын таза абада өткөрүү сунушталат. Бир нече тыюу салуулар бар, мектептерде ар кандай иш-чараларды өткөрүүгө уруксат берилбейт, ата-энелер менен башка адамдарга мектепке кирүүгө болбойт. Мектептерге, класстарга жана окуу процессине аралашкан бардык жайларга тазалоо иштери боюнча бир нече талаптар коюлду. Бөлмөнү убагында желдетип туруу, дезинфекциялоочу каражаттар менен күнүгө эки ирет классты жууп чыгуу сыяктуу иштер».

Өлкөдө коронавирус пандемиясына байланыштуу 16-мартан баштап окуу жайларда карантин жарыяланып, студенттер менен окуучулар онлайн билим ала башташкан. Сентябрда 1-класстын окуучулары гана мектепке барышкан.

www.