780 Бардыгы /

Талас облусунун Бекмолдо айыл өкмөтүндө жайгашкан Жерүй алтын кени өрттөлүп, таланууда. Бул тууралуу аталган айыл өкмөтүнүн башчысы Кубаныч Каныбеков «Азаттыкка» билдирди.

Анын айтымында, 6-октябрда саат 11ге чейин 200 чамалуу кишини тосуп, кармап турушкан. Бирок токтото албай калгандыктан, жаалданган топ кендин имаратына өрт коюп, кампалары, кеңселери күйүп жатат.

Ал ортодо «Кыргызкөмүр» мамлекеттик ишканасы 6-октябрда түштөн кийин Нарын облусунун Жумгал районундагы Кара-Кече көмүр кенин топ киши басып алганын билдирди. Анын айтымында, кенди басып алууну «Саяк» деген каймана аты бар кримавторитет Кадыркулов уюштурган деген маалыматтар тарап жатат.

Ишкананын маалыматына караганда, басып алгандар филиалдын кассасынан акча жана көмүр иштетүүдөн түшкөн жарым миллион сомдон ашык каражатты тартып алган. «Кыргызкөмүр» көптөгөн машинелер кенге документсиз жана төлөмсүз кирип жатканын, бул жагдай жана кенди басып алуу 2020-2021-жылдагы жылуулук берүү мезгилине терс таасирин тийгизиши мүмкүн экенин эскертти.

6-октябрда Жалал-Абад облусунун Ала-Бука районундагы «Full Gold Mining» алтын компаниясы убактылуу ишин токтотту. Бул тууралуу «Азаттыкка» өкмөттүн райондогу ыйгарым укуктуу өкүлүнүн милдетин аткаруучу Бектур Сагынбаев маалымдады. Анын айтымында, компанияга айрым адамдар барып, ишин токтотууну талап кылышкан.

Ага чейин Чаткал районунун Терек-Сай шаарчасындагы алтын кенин иштеткен түркиялык компания да жергиликтүү элдин талабы менен кен казуу иштерин токтоткону маалым болгон.

Kaktus.media басылмасы Кант шаарында жергиликтүү тургундар карьерди талкалап, андагы техниканын баарын өрттөп салышканын билдирди. Маалыматка караганда, ал жер ондогон адамды иш менен камсыз кылып келген.

6-октябрда түштөн кийин белгисиз адамдар Кара-Балта шаарындагы алтынды башка кошундулардан тазалоочу өлкөдөгү жалгыз заводду басып алышкан. Бул тууралуу 24.kg сайты «Кыргызалтын» мамлекеттик ишканасына таянып билдирди. Маалыматка караганда, заводго кирип барган ондогон кишинин кандай талаптарды койгодугу жана кайсыл партиянын өкүлдөрү экени белгисиз.

Парламенттик шайлоонун жыйынтыгына каршы чыккан саясий партиялардын тарапкерлери 5-октябрда мөөнөтсүз митингге чогулуп, 6-октябрга оогон түнү президенттин аппараты жана Жогорку Кеңеш жайгашкан имаратты, УКМКны басып алып, камактагы саясатчыларды бошоткон. 6-октябрда саясий партиялардын Координациялык кеңеши түзүлгөн.

WWW