1,488 Бардыгы /

“Шаарларды өнүктүрүү” долбоорунун алкагында Жалал-Абаддагы Кербен шаарына 204 млн сом бөлүнгөн.

Эл аралык АРИС уюму Жалал-Абад облусунда өз ишмердүүлүгүн улантып жатат. Анда басымдуу элет калкынын жашоо шартын жакшыртуу, социалдык-экономикалык,  айыл жана мал чарбачылыгын  өнүктүрүү багытындагы чакан жана ири долбоорлорду ишке ашырууда.

Акыркы эки жылдын аралыгында жеке ветеринар кызматтын  туруктуу жана сапаттуу аткарышын колдоого Жалал-Абад облусу боюнча 67 жайыт пайдалануучулар бирикмесинен 134 ветеринарга  жалпы суммасы 14 млн  268 миң сомдук материалдык колдоо көрсөтүлдү.

Учурда аталган долбоор айыл чарбага  колдоо көрсөтүү басым жасоодо. Бүгүнкү күнгө жалпы 560  млн 483 миң  сом акча каражат жумшалса, анын 401 млн 816 миң  сому АРИСтен грант катары каржыланган. Бул тууралуу АРИСтин облустук  өкүлчүлүгүнүн  аймактык координатору Айбек Касымов билдирди.

Анын айтымында,  жергиликтүү жамааттын  салымы  158 млн 667 миң  сомду түздү. Бул инвестициялык акча каражаттарын атайын техникалар сатып алууга, жайыттардын тактоо, жер жерлерде ветеринардык пункт, көпүрө, мал суу ичүүчү жайлар  курулуп, койдун жүнүн кыркуу, булактарды каптаждоо жана башка кичи долбоорлорго жумшалган.

– Жайыт пайдалануучулардын муктаждыктарына ылайык атайын техникаларды сатып алуу боюнча өткөрүлгөн тендерлердин негизинде МТЗ-82,1 тракторлору, МТЗ-1221.2, бульдозер-тракторлору, комбайн, фронталдык жүктөгүч, самосвал,  чөп жыйноочу техника, соко жана башка шаймандары менен 228даана атайын техникалар сатылып алынды. Алар айыл өкмөттөрүнүн балансына коюлуп, жайыт комитеттерине келишимдик негизде оперативдүү башкарууга берилди,- дейт А.Касымов.

Белгилей кетсек, АРИСтин “Шаарларды өнүктүрүү” долбоорун каржылоого республика боюнча  Кербен, Токтогул, Сүлүктү жана Балыкчы шаарлары кирген. Андан  Аксы районунун Кербен шаарына 204 млн сом каражат бөлүнгөн.

“Аймак”