1,041 Бардыгы /

Нур-Султан шаарынын райондор аралык сотунда жеңил рельстүү транспорт системасын куруудагы коррупция иши боюнча болжолдуу угуулар башталды.

Шаардык соттун маалыматына караганда, бул иш боюнча Нур-Султан маслихатынын мурдагы катчысы жана депутаты Жанат Нурпиисов, акимчиликтин Жүргүнчү транспорту жана автоунаа жолдору башкармалыгынын мурдагы жетекчиси Рашид Аманжулов, «Астана Innovations» ачык акционердик коомунун башкармалыгынын мурдагы төрагасы Талгат Ашим жана дагы төрт ишкер айыпталууда.

Аларга «Уюшкан топ түзүү, аны жетектөө» жана «Ишенип берилген мүлкү ээлеп алуу же уурдоо» беренелери боюнча айып тагылган.

Буга чейин Коррупцияга каршы күрөшүү кызматы курулушта акча уурдоо схемасын Нур-Султан акиминин мурдагы орун басары Канат Султанбеков менен «Астана ЛРТ» компаниясынын мурдагы жетекчиси Талгат Ардан уюштурганын, аларга эл аралык издөө жарыяланганын билдирген.

Тергөөнүн маалыматына караганда, аткаминерлер ишкерлер менен бирге аткарылган жумуштардын баасын жогорулатып, жалган ишканалар аркылуу миллиарддаган теңгени өздөрүнө алып турушкан.

Казакстандагы алгачкы жеңил рельстүү транспорт системасынын курулушу башталган 2017-жылдан бери өлкөдө анын максаттуулугу тууралуу талаш-тартыш токтобой келет. Ал жүргүнчулөрдү баш калаанын сол жээк тарабынан аэропортко жана темир жол бекетине ташуу үчүн курулуп жатканы айтылган.

Өткөн жылы жайында Казакстандын каржы министри Алихан Смаилов бул долбоорду ишке ашыруу үчүн Кытайдын Мамлекеттик өнүктүрүү банкынан 1,5 миллиард доллар карыз алынганын, анын 344 миллион доллары курулуш иштерине колдонулганын билдирген. Бирок «жалданма компанияларга байланышкан көйгөйлөрдөн улам» Кытай банкы каржылоону токтоткон. Азыр казак өкмөтү курулушту бүткөрүүгө 1,2 миллиард доллар бөлүп берүүнү пландап жатат.

2019-жылы күзүндө президент Касым-Жомарт Токаев бул долбоорду талаштуу деп атап, аны сынга алган.

Көп өтпөй Нур-Султандын бийлиги курулуш иштерин улантуу ниетин билдирип, системадагы станциялар менен жер алдындагы өтмөктөрдүн саны азайтыларын кабарлаган.

WWW