765 Бардыгы /

Өзбекстанда Enter Engineering компаниясы курулушта иштеп жаткан жумушчулары нааразылык акциясын өткөргөндөн кийин маяналарын төлөп бере баштады.

21-октябрда Кашкадарыя облусунун Гузор районунда курулуп жаткан объектинин миңдеген жумушчусу административдик имаратка чабуул жасап,башаламандык уюштурушкан.

Окуя болгон жерде тартылган видеодон кеңселер чачылып, эмеректер жана компьютерлер талкаланганын көрүүгө болот.

Айрым булактар абалды жөнгө салуу үчүн Гузор районуна Улуттук гвардия менен полициянын күчтөрү жөнөтүлгөнүн билдиришкен.

Аны жөнүн айткысы келбеген жумушчулардын бири Enter Engineering компаниясы 20-октябрь күнү кечинде кызматкерлерди тамак менен камсыз кылбай койгондон кийин башаламандык башталганын билдирди.

«Тамак-аш маселеси жана айлыктын убагында берилбегендигинен тышкары башаламандыкка карантиндик чектөөлөр да себеп болду. Коронавируска байланыштуу жумушчуларды узак убакыт үйүнө жибербей, курулуш аянтына түнөтүп иштетип келишкен», — деди ал.

Өз кезегинде компаниянын өкүлү башаламандык жумушчулар ашканага кире турган электрондук башкаруудагы эшикти ача албай койгондон кийин башталганын билдирди.

Өлкөнүн Башкы прокуратурасы бул окуя боюнча тергөө жүрүп жатканын кабарлады.

WWW