1,380 Бардыгы /

ЖАЛАЛ-АБАД. Жалал-Абад шаардык кеңешинин өткөн кезектеги 28-сессиясында 6 маселе көтөрүлүп, жыйын соңунда биринчи вице-мэр учурдагы мэрдин убактылуу аткаруучусу туура эмес дайындалганы тууралуу билдирди. 

Жалал-Абад шаарынын биринчи вице-мэри Болот Узакбаев мэрдин убактылуу аткаруучусу болуп Нуртилек Орозбаев эмес, конституция боюнча биринчи вице-мэри убактылуу мэрдин аткаруусу болуусу керектигин айтты.

 “Жергиликтүү өз алдынча башкаруунун 43-беренесинин 9- пунктунда жазылгандай, мэр иштен кеткенде анын ордуна убактылуу мэр кызматы мага жүктөлөт. Шаардык кеңештин эч кимди убактылуу мэр кылып дайындоого укугу жок. Азыркы учурда сиздердин токтомуңуздар менен мэрдин убактылуу кызматы Нуртилек Орозбаевге тапшырылган, мен юрист катары да айтып кетем, сиздердин токтомуңуздар мыйзамсыз. Бул иш боюнча шаардык прокуратурага кайрылганда прокуратура ич ара ишиңиздерди өзүңүздөр чечип алыңыздар деген жообун айтышты”,- деди биринчи вице-мэр Болот Узакбаев.

Ошону менен депутаттар да өздөрүнүн сын-пикирлерин айтышты. 5-октябрда мэр өз арызын жазардан жарым саат мурун, мэр кызматынын убактылуу аткаруучусу катары Нуртилек Орозбаевди дайындаганын айрым депутаттар айтышса, Болот Узакбаев “Мэр ошондой буйрук чыгарса, сиздердин токтомуңуздар керек эмес. Бирок менде анык факт бар, ал буйрук жасалма”,-деп кошумчалады.

Жыйын соңунда Б.Узакбаевдин сунушу депутаттардан колдоо таппай, мэрдин убактылуу кызматында Н.Орозбаев калды.

Байканбек САДЫКОВ “Аймак”