729 Бардыгы /

Косовонун президенти Хашим Тачи кызматтан кетти. Ага чейин Гаагадагы атайын прокуратура ага 1990-жылдардын аягында Югославиядагы куралдуу кагылышуулар маалында аскердик кылмыш жасаган деген расмий айып койгону белгилүү болгон.

Тачи Косовонун баш каласы Приштина шаарында өткөргөн басма сөз жыйынында айыптоолорду четке кагып, бирок мурдагы убадасын аткарып кызматтан кетерин айтты.

Президенттин отставкасынан кийин анын милдеттерин парламенттин спикери аткарат деп күтүлүүдө.

Быйыл июнь айында Косоводогу кылмыштар боюнча сотто атайын прокурор Хашим Тачи менен парламенттин экс-спикери Кадри Весели баштаган бир канча адамга 1990-жылдардын аягындагы куралдуу кагылышуу учурундагы адамзатка каршы кылмыштарга байланыштуу айып койгон. Аты аталган адамдар күнөөсүн мойнуна алган эмес. Анда атайын прокуратура кылмышка шектүүлөр «100дөй кишини өлтүрүү» жана «адамдардын дайынсыз жоголуп, кыйноого жана куугунтукка кабылганы» үчүн кылмыш жообуна тартылууга тийиш деп маалымат тараткан.

Хашим Тачи менен Кадри Весели 1990-жылдары Косовону Боштондукка чыгаруу армиясынын кол башчылары болгон. Албан улутундагылардан турган кошуун 1998-1999-жылдардагы согушта Белграддын коопсуздук күчтөрүнө каршы күрөшүп келген. Весели ушул тушта Косовонун Демократиялык партиясын жетектейт жана парламент депутаты.

Албандар үстөмдүк кылган Сербиянын провинциясында 1998-1999-жылдары элдик козголоң башталып, Белград аны күч менен баскан. НАТОнун 78 күндүк бомбалоосунан кийин Сербия аскерлерин Косоводон чыгарып кеткен. Кагылышууда 10 миңден көп киши өлгөн, 1600дөн ашуун адам азыркыга чейин дайынсыз.

Косово 2008-жылы өзүн Сербиядан эгемен өлкө деп жарыялаган. Анын эгемендигин дүйнөдөгү 100дөн ашуун мамлекет, арасында АКШ, Еврошаркеттин көпчүлүк мүчөлөрү таанышкан. Белград менен Москва жана дагы бир нече өлкө Косовону дагы эле Сербиянын бир бөлүгү деп эсептейт.

Эки өлкө тең Евробиримдикке мүчө болуп кирүүгө умтулуп келатышат. Шаркеттин шарттарына ылайык, алар өз ара сүйлөшүп, ортодогу маселелерди чечүүгө тийиш.

WWW