3,150 Бардыгы /

XVII кылымда курулуп, ЮНЕСКОнун дүйнөлүк мурастар тизмесине кирген Хива шаарындагы архитектуралык эстеликтер реставрациялык иштердин жүрүшүндө олуттуу зыянга учуроодо.

Жергиликтүү реставраторлордун айтымында, «Нуриллабай» сарайынын, Ибрагим кожо медресесинин жана «Таш-Хаули» имаратынын дубалдары жана андагы оймолор бузулууда.

2012-2016-жылдары жүргүзүлгөн реставрациялык иштердин жүрүшүндө Хива шаарындагы «Дишан-Кала» чебинин аймагында жайгашкан «Нуриллабай» сарайындагы хрусталь люстралар, баалуу таштар жана байыркы дарбазалар уурдалган. Жыйынтыгында бул иш боюнча он киши кармалып, кылмыш жоопкерчилигине тартылган.

– «Нуриллабай» сарайында реставрация иштерин жүргүзгөндөр түрмөгө камалган. Бирок ал окуядан эч ким сабак алган эмес окшойт, азыр Хивадагы тарыхый жайларды реставрациялоо ишин кайрадан эле ошол ишканага тапшырышты. Алар эстеликтерди талакалап жатышат, рестраврация мындай болбойт», — деди хивалык реставратор Абдулла Маткаримов.

«Нуриллабай» сарайы менен катар Хива шаарындагы башка архитектуралык объектилер Өзбекстандын Маданият министрлигине караштуу Маданий мурастарды коргоо инспекциясынын көзөмөлүндөгү тарыхый эстеликтер деп эсептелет.

«Нуриллабай» сарайы 1893-1904-жылдары хива ханы Мухаммад Рахим-хан II тарабынан уулу Асфандияр-хандын урматына курулган.

Өткөн жылы Европа реконструкциялоо жана өнүктүрүү банкынын президенти Сума Чакрабарти башында турган делегация Хорезмге барган. Ага карата «Нуриллабай » сарайында банкет уюштурулуп, бул көрүнүштү өзбекстандык социалдык түйүн колдонуучулары сындап чыгышкан.

WWW