948 Бардыгы /

Өкмөт башчылык кызматын убактылуу токтоткон Садыр Жапаров орус тилин расмий макамынан ажыратуу сунушу боюнча пикирин билдирди.

Ал социалдык түйүндөрдөгү баракчаларына «орус тили өлкөдө сөзсүз түрдө расмий тил болуп калышы керектигин» жазды.

«Кечээ Конституциялык кеңешменин бир мүчөсү Конституциядан орус тилинин расмий макамын алып салууну сунуштады. Бул сунуш туура эмес. Орус тили БУУнун трибунасында колдонулган алты тилдин бири болот. Мындан сырткары биз кылымдардан бери колдонуп келген, улуттардын байланышын бириктирген тил болуп саналат. Евразия өлкөлөрү менен болгон байланышта жана карым-катнаштарды орус тилсиз жүргүзүү мүмкүн эмес», — деп жазды ал.

26-ноябрда Конституциялык кеңешменин мүчөсү, коомдук ишмер Садирдин Төралиев кыргыз тилинде гана атайын макам болушу керектиги тууралуу сунушун айтып, себебин кыргыздар эне тилин унутуп баратканы менен түшүндүргөн. Бул сунуш дароо кызуу талкуу жараткан.

Кеңешменин мүчөсү, Кыргыз мамлекеттик университетинин Манас таануу жана лингвистика институтунун директору, профессор Сыртбай Мусаев журналисттердин суроосуна жооп берип жатып тил маселесине келгенде башка тилдерден мурда мамлекеттик тил жөнүндө ойлонуу зарыл экенин айтып, Кыргызстандын тагдыры Орусия менен байланышта экенин белгилеген.

Кыргызстанда кыргыз тили мамлекеттик, орус тили расмий тил деген макамга ээ.

Баш мыйзамдын жаңы долбоорун Жогорку Кеңеш коомдук талкууга 17-ноябрда чыгарды. Аны талкуулаш үчүн Конституциялык кеңешме түзүлгөн.

Кеңешмеде англис тилине да расмий макам берүү керек экендиги айтылып, оппоненттер мындай сунушту абсурд деп аташкан.

WWW