846 Бардыгы /

Өзбекстандын Ички иштер министрлигине (ИИМ) караштуу Жол кайгуул жана коомдук тартипти сактоо башкармалыгында иштеген кызматкерлердин айлыктары 30-40 пайызга кыскартылды. Бул тууралуу Фергана, Ташкент жана Хорезм облустарындагы ички иштер башкармалыктардын кызматкерлери билдиришти.

Фергана облусундагы Бешарык райондук ИИБсинин кызматкери айлык акысы менен кошумча төлөмдөрдү кошуп эсептегенде 50% кыскартылганын айтты.

– Карантин деген шылтоо менен бюджетте иштегендердин, анын ичинде милиция кызматкерлеринин айлыктары 50% кыскартылды. Жумуш өтө көп, бирок аз төлөп жатышат. Тапшырмаларды аткаруу үчүн кагаз, бензин керек, күнү-түнү көчөдө тамактанууга туура келет. Мамлекет биздин чыгымдарыбызды компенсация кылбай келет», — деди ал.

Ташкент ИИБсинин Жол кайгуул жана коомдук тартипти сактоо башкармалыгынын кызматкери буга чейин айлыгы 3 миллион 550 миң сум (350 долларга жакын) болсо, азыр 500 миң сумга аз (50 доллар) алып жатканын билдирди.

Юрист Маримбой Ражабов өлкө мыйзамдарына ылайык, карантин маалынде же башка чектөөлөр шартында жумуш берүүчү кызматкерлерине орто айлык акы төлөп берүүгө милдеттүү экенин белгиледи. Анын айтымында, Эмгек кодексинен тышкары президенттин карантин тууралуу жарлыгында да бюджетте иштеген кызматкерлерге айлык акы толук төлөнүп берилери кепилденген.

Карантин маалында Өзбекстандын Улуттук маалымат агенттигинин, Маданият министрлигине караштуу Маданий мурастар департаментинин жана башка ондогон мамлекеттик мекемелердин кызматкерлеринин айлыктары кыскартылган.

Өлкөдөгү бюджеттик мекемелердин биринин эсепчиси кызматкерлердин айлыктары Каржы министрлигинин буйругу менен кыскартылып жатканын билдирди. Анын айтымында, бул буйрук президенттин жарлыгына негизделген. Бирок документте «кошумча төлөмдөр менен айлыктарды кыскартуу тууралуу» бир да сөз жок.

Каржы министри Тимур Ишметов парламенттин 11-сентябрдагы жыйынында карантинге, ошондой эле Бухара жана Сырдарыя облустарындагы жаратылыш кырсыктарына байланыштуу мамлекеттик бюджеттин чыгаша бөлүгүнө олуттуу өзгөртүүлөр киргизилгенин билдирген.

WWW