717 Бардыгы /

Жогорку сот 30-ноябрда кримтөбөл Азиз Батукаевдин абактан мыйзамсыз бошотулушуна байланыштуу ишти кайра кароого Бишкектин Биринчи май райондук сотуна жөнөттү. Бул тууралуу 30-ноябрда «Азаттыкка» мурдагы президент Алмазбек Атамбаевдин адвокаты Замир Жоошев билдирди.

Анын айтымында, Атамбаевди үй камагына чыгаруу же абакта калтыруу маселеси райондук соттун биринчи отурумунда каралат.

«Биз Жогорку соттон төмөнкү инстанциядагы соттордун өкүмдөрүн жокко чыгарып, ишти кайра кароого жөнөтүүнү суранганбыз. Жогорку сот биздин өтүнүчтү канааттандырып, өкүмдөрдү жокко чыгарып, ишти кайра кароого районго жиберди. Эми башка, жаңы судья карайт. Бөгөт чарасы ошондо райондук соттун биринчи отурумунда чечилет», – деди ал.

Кыргызстанда баңгизат сатуу, мыйзамсыз курал сактоо, ошондой эле адам өлүмүнө алып келген башаламандык уюштуруу үчүн айыпталып, 16 жыл 8 айга эркинен ажыратылган кримтөбөл Азиз Батукаев 2013-жылы «айыккыс илдетке чалдыкты» деген негизде мөөнөтүнөн мурда түрмөдөн чыккан. Ал атайын коштоо менен Бишкекке жеткирилип, Орусияга учуп кеткен.

Кримтөбөлдүн мыйзамсыз бошотулушу боюнча кылмыш иши 2019-жылдын январында кайра иликтенип, сотко ошол жылдын октябрында өткөн.

Быйыл 23-июнда Бишкек шаарынын Биринчи май райондук сотунун судьясы Эмилбек Каипов Атамбаевди «Батукаевдин иши» боюнча өзүн жана жакындарын мүлкүнөн ажыратуу менен 11 жыл эки айга кескен.

WWW