696 Бардыгы /

Францияда парламенттик көпчүлүктү түзгөн депутаттар “глобалдык коопсуздук” жөнүндөгү мыйзам долбоорунун 24- беренесинин жаңы версиясын сунуштоого даяр экенин билдиришти.

Бул берене кызматтагы полициячыларды видеого тартууга тыюу салганы үчүн сынга кабылган.

30-ноябрда парламенттин төмөнкү палатасындагы “Алга, Республика” фракциясынын башчысы, ИИМдин мурдагы жетекчиси Кристоф Кастанер коомчулуктун нааразылыгын жараткан бул беренени өзгөртүүгө даяр экенин билдирди.

“Глобалдык коопсуздук” жөнүндөгү мыйзам долбоорун “Алга, Республика” фракциясынын өкүлдөрү менен парламенттеги Agir ensemble (“Бирге аракеттенүү”) тобу демилгелешкен. 24-беренеде эгер полициячылар же жандармдардын жүзү көрүнгөн видео алардын физикалык же психикалык кол тийбестигине зыян келтирсе, бул видеону тараткандарга 45 миң евро айыппул салуу же бир жыл түрмөгө кесүү сунушталган.

Бул берене Францияда ири нааразылыктарды жараткан. Укук коргоочулар менен журналисттер муну демократия, сөз эркиндиги жана маалымат алуу укугун тебелөө катары баалашкан.

Президент Эммануэль Макрон өткөн жума күнү Елисей сарайында парламенттик көпчүлүктү түзгөн фракция башчылары, премьер-министр, ИИМ жетекчиси жана юстиция министри менен жолуккан. Президент полициячылар музыка продюсери Мишель Зеклерди сабаган видеожазуу “уятка калтырганын” билдирген. Ал өкмөттөн мыйзам долбооруна тезинен өзгөртүү киргизип, жарандар менен аларды коргой турган кызмат адамдарынын ортосундагы ишенимди калыбына келтирүүнү талап кылган.

WWW