645 Бардыгы /

АКШнын Юстиция министрлиги ноябрдын башында өткөн президенттик шайлоонун жыйынтыктарына таасир эте турган мыйзам бузуулар боюнча далилдерди тапкан жок. Бул тууралуу өлкөнүн башкы прокурору Уильям Барр «Ассошиэйтед Пресс» агенттигине берген маегинде билдирди.

Буга чейин президент Дональд Трамп шайлоодо бурмалоолор болгонун, анын жеңиши уурдалганын бир нече жолу билдирип, сотко кайрылган.

Барр Башкы прокуратура менен ФБР кызматкерлери бардык даттануулар боюнча, анын ичинде «электрондук жабдуулар шайлоочулардын добуштарын бурмалаган» деген Трамптын билдирүүсү боюнча текшерүү жүргүзүп жатышканын, бирок азырынча бул маалыматтар аныкталбаганын билдирди.

Уильям Барр дайыма Трамптын жакын өнөктөшү болуп келген. Шайлоонун алдында ал почта аркылуу добуш берүү бурмалоолорго жол ачышы мүмкүн экенин бир нече жолу айткан.

Шайлоодон кийин Трамптын штабы бир катар негизги штаттардагы добуш берүү жыйынтыктарын жокко чыгаруу максатында сотко бир нече арыз менен кайрылган. Бирок соттор доо арыздарды негизсиз деп четке кагышкан.

Күн мурун Висконсин штаты добуштар кайра саналгандан кийин шайлоодо демократтардын талапкери Жо Байден жеңишке жеткенин билдирди. Ошол эле күнү кечинде Трамптын командасы 221 миңден ашык бюллетенди жараксыз деп таануу талабы менен штаттын Жогорку сотуна доо арыз менен кайрылды.

АКШда президент болуп шайлануу үчүн 270 шайлоочулар коллегиясынын добушуна ээ болуу керек. 3-ноябрдагы шайлоодо Байден 306, Трамп 232 добуш алган. Расмий түрдө президенттик шайлоонун жеңүүчүсү 14-декабрда шайлоочулар коллегиясынын жыйынында жарыяланат.

WWW