825 Бардыгы /

Түркмөнстанда коронавирустун белгилери менен ооруканага кайрылгандар көбөйүп, медициналык жайлардын көбү бейтаптарды кабыл алуудан баш тарта баштады. Бул тууралуу «Азаттыктын» түркмөн кызматы билдирди.

«Акыркы күндөрү Лебап облусунун Сакар жана Дянев райондорунда коронавирус өтө тездик менен жайылып жатат. Ооруканаларда бейтаптарды жаткырууга орундар жок калды», — деди жергиликтүү дарыгерлердин бири.

Маалыматтарга караганда, ооруканага жатуу үчүн ондогон чакырым жол жүрүп, район борборлоруна барган бейтаптарга да медициналык жайлардан орун алуу оор болууда.

«Түрмөнабаддагы ооруканаларда шаардыктардын өзүлөрүнө орун жетишпей жатат. Шаардык инфекциялык ооруканада орундар дээрлик жок, палаталардын баары толуп калган. Ошондуктан бизге тез жардам кызматы менен келгендерди да шаардык ооруканага жөнөтүп жатабыз», — деди Түркмөнабаддагы инфекциялык оорукананын дарыгери.

Өлкөнүн башка аймактарында да коронавирустун белгилери менен кайрылган бейтаптар көп болуп жаткандыктан, буга чейин бир катар медициналык жайлар карантинге жабылганы кабарланган. Өткөн жуманын ичинде эле Мары облусундагы эки оорукана бейтаптарды кабыл алууну токтоткон. Буга байланыштуу жарандар үйлөрүндө өз алдынча дарыланууга аргасыз болушууда.

Ал ортодо анализинен COVID-19 вирусу аныкталгандан кийин каза болгон адамдардын өлүмүнүн себеби катары «пневмония» көрсөтүлүүдө. Алардын тажиясы коопсуздук органдарынын кызматкерлеринин көзөмөлүндө өтүп жатат. Ошол эле маалда Түркмөнстандын бийлиги өлкөдө коронавирус жуктурга бир да учур каттала электигин билдирип келүүдө.

WWW