828 Бардыгы /

Алматынын акими Бакытжан Сагинтаев мамлекеттин маалыматтык саясатын ишке ашыруу үчүн шаар бюджетинен ЖМКларга миллиондогон каражат бөлүүнү «кадыресе көрүнүш» деп эсептейт.

Анын айтымында, быйыл акимчиликте басылмаларга материалдарды жайгаштыруу үчүн 700 миллион теңгеге жакын (1,6 миллион доллар) каражат каралган.

— Бул иш шаар акиминин ишин көрсөтүү үчүн эмес. Менин «Инстаграмда» баракчам бар, отчетторумду ошол жерге жайгаштырып турам. Мындан тышкары басма сөз катчым бар, ал да өз ишин аткарып жатат. Ошол эле маалда шаарда кандайдыр бир иштер аткарылып жатса аны көрсөтүп, айтыш керек да. Мен мындан эч кандай жаман нерсе көргөнүм жок, бул маалыматтык саясат. ЖМКларга бизди мактагыла деп төлөбөйбүз, биз өзүбүздүн ишибизди көрсөтүп жатабыз. Бул шаар акиминин гана иши эмес, мамлекеттин маалыматтык саясаты, — деди Сагинтаев.

Алматы акимчилигинин маалыматына караганда, басылмалар аркылуу мамлекеттин маалыматтык саясатын жүргүзүү үчүн мекеме 2020-жылы 728 миллион теңге, 2019-жылы 722 миң теңге бөлгөн.

Казакстандын мамлекеттик сатып алуулар порталына ылайык, 2019-жылдан бери материал жайгаштыруу үчүн Алматы акимчилигинен эң көп каражат алган жеке ЖМКлардын арасында NewTimes.kz (35,3 миллион теңге), Zakon.kz (28,1 миллион теңге) сайттары, Qamshy Media (23,7 миллион теңге), «Рысбай-ЕЛ» гезиттери (17,8 миллион теңге) бар. Мамлекеттик ЖМКлардын ичинен «Қазақстан» телеканалы 23 миллиона теңге, «Хабар» телеканалы 22 миллион теңге, «Егемен Қазақстан» гезити 17,4 миллион теңге алган.

2019-2020-жылдары ЖМКларга мамлекеттик буйрутма берүү үчүн жумшалган жалпы каражат 1,5 миллиард теңгеге жеткен жок. Ошол эле маалда Алматы акимчилиги тарабынан каржыланган муниципалдык телеканалдар менен гезиттерге бөлүнгөн жалпы сумма 4,8 миллиард теңгени түзөт. Алсак, «Алматы» телеканалы мамлекеттик сатып алуулар порталындагы келишимдер боюнча 4 миллиард теңге, Alatay Aqparat («Алматы ақшамы» жана «Кечки Алматы» гезиттери) — 823,6 миллион теңге алган.

Чиновниктердин ишмердүүлүн чагылдыруу үчүн ЖМКларга акча төлөө тажрыйбасы Казакстандын ар бир аймагында бар. Акимчиликтердин буйрутмасы менен жарыяланган материалдарда мамлекеттик программалардын ишке ашырылышы жана жогору жактан келген тапшырмалардын аткарылышы тууралуу маалыматтар чыгып турат.

WWW