960 Бардыгы /

Ирандык аткаминер өлкөнүн руханий лидери аятолла Али Хаменеи катуу ооруп калганы жөнүндөгү кептерди четке кагып, 81 жаштагы жетекчи адаттагыдай эле режимде иштеп жатканын билдирди.

7-декабрда Хаменеинин канцеляриясы менен байланышы бар чиновник Мехди Фазаэли Twitter’ге: «Кудайдын мээримдүүлүгү жана диний күйөрмандарынын дубасы менен мырзанын [аятолла Хаменеи] ден соолугу чың жана өзүнүн планын ички тартиптерге ылайык энергиялуу аткарып жатат», – деп жазды.

Өткөн жума күнү бир катар чет өлкөлүк агенттиктер Ирандын президенти Хасан Роуханинин Хаменеи менен белгиленген жолугушуусу болбой калганын, анын милдеттери уулу Можтабу Хаменеиге өткөнүн жазышкан.

Маалыматтарга караганда, аятолла Хаменеи акыркы жолу эл алдына 24-ноябрда чыккан. Ошол эле күнү анын Twitter’деги аккаунтуна акыркы посту жарыяланган.

Хаменеи 1989-жылы Ирандын руханий лидери болуп шайланганга чейин он жылдай Ирандын президенти болгон. 2014-жылы ал жалкы безинен рак болуп, операция жасаткан.

Ирандын мамлекеттик IRNA маалымат агенттиги Тегеранда биржалык курстардын индексинин төмөндөөсү дал ушул «тастыкталбаган айың-кептер менен байланышта» экенин билдирди.

WWW