678 Бардыгы /

16-декабрда Жаңы-Өзөн шаарынын тургундары 2011-жылдын декабрь айындагы кандуу окуяны эскеришти. Калаада полициянын көзөмөлү күчөтүлдү

Акимчилик шаардык аянтта тынч жыйын өткөрүүгө уруксат берген жок. Жергиликтүү бийлик өтүнмө беш жумушчу күндүн ичинде караларын, Мангистау облусунда эпидемиологиялык абал начарлаганын жүйө келтирген.

Калаанын бир нече жашоочусу кайгылуу окуя учурунда курман болгон Радик Юсуповдун үйүндө чогулушту.

“Азаттыктын” казак кызматы Жаңы-Өзөндө полициянын көзөмөлү күчөтүлгөнүн, шаардык аянттын аймагында полиция автоунаалары жана автобустар тизилип турганын билдирди.

Өткөн жума соңунда жаңы-өзөндүк эки активист — Муратбай Жумагалиев менен Нуржан Аренов 7 күнгө камалганы жөнүндө маалымат тараган. Анын алдында активисттер соцтармактарга “Эгемендик күнүндө шаардык аянтка келишип, Жаңы-Өзөн окуясынын курмандыктарын эскерип, куран окушарын” жазышкан. Прокуратура активисттер элди митингге чакырышканы үчүн камалганын маалымдаган. 14-декабрда ондой киши акимчиликке келип, аларды бошотууну талап кылышкан.

16-декабрь, Эгемендик күнүндө 1986 жана 2011-жылкы окуялардын курмандыктары Алматы, Нур-Султан, Чымкент шаарларында да эскерилди.

1986-жылы 17-18-декабрь күндөрү казак жаштары ал кезде өлкө жетекчилигине Кремль тарабынан Геннадий Колбиндин дайындалышына нааразы болуп чыгышкан. СССРдеги эң ири акциялардын бири катары тарыхка кирген митингдер күч менен басылган.

2011-жылы 16-декабрда Жаңы-Өзөн шаарындагы мунайчылардын бир нече айлык иш таштоосу кан төгүү менен коштолгон. Тынч митингдин катышуучуларына каршы ок атышканда расмий маалымат боюнча 17 киши курман болгон. Жергиликтүү тургундар курман болгондор андан көп дешет.

WWW