630 Бардыгы /

Парижде сот 2015-жылы сатиралык Charlie Hebdo журналынын редакциясына жана супермаркетке кол салууга айыпталган кишилерге карата өкүм чыгарды.

Le Figaro басылмасы билдиргендей, сот теракттын башкы аткаруучусу катары аталаган Али Риза Полатты 30 жылга кести. Прокуратура анын өмүр бою эркинен ажыратууну сураган. Анын адвокаты соттун өкүмүнө каршы даттанарын билдирди.

2015-жылы 9-январда Париждеги супермаркетте кишилерди барымтага алууга шектелген Амеди Кулибали полициячылар тарабынан өлтүрүлгөн. Анын шериги Хайят Бумеддьен качып кетүүгө үлгүргөн. Ал сыртынан 30 жылга соттолду.

Али Риза Полат менен Хайят Бумеддьен ага-ини Куаши менен Кулибалинин эң жакын адамдары деп аталып келет. Тергөө алар кол салууга түздөн-түз катышкан деп эсептейт.

Эң эле оор жазаны “кол салуунун башкы шыктандыруучусу жана жетекчиси” деп аталган Мухаммед Белхусин алды. Сот аны сыртынан өмүр бою эркинен ажыратты. Белхусин сот жараянына катышкан жок, анын Сирияда өлгөнү айтылып жүрөт.

2015-жылы 7-январда Париждеги “Шарли Эбдо” (Charlie Hebdo) сатиралык журналына 7-январдагы кол салууда 12 кишинин өмүрү кыйылган. Алардын сегизи журналисттер эле. Дагы 11 адам жараат алган. Кол салууну ага-ини Саид менен Шериф Куаши жүзөгө ашырган. Эки күндөн кийин алар Даммартен-ан-Гоэль районундагы басмаканада кишилерди барымтага алышкан. Ал эми алардын шериктери Амеди Кулибали менен Бумеддьен Венсендеги супермаркетке чабуул жасап, беш киши өлгөн. Француз спецназдары Куаши менен Кулибалинин өлтүрүшкөн.

WWW