567 Бардыгы /

21-декабрда Казакстандын Актөбө шаарындагы сот «тыюу салынган уюмдун ишмердүүлүгүнө катышкан» деп айыпталган активист Алибек Молдиндин иши боюнча өкүм чыгарды.

Ага ылайык, Молдин 2021-жылдын 21-декабрына чейин пробациялык көзөмөлдө болот. Бул аралыкта анын социалдык түйүндөр менен месседжерлерге билдирүүлөрдү жайгаштыруусуна тыюу салынат.

37 жаштагы Алибек Молдин өлкөдө тыюу салынган «Казакстандын демократиялык тандоосу» кыймылы менен «Көчө партиясынын» ишмердүүлүгүнө катышкан деп айыпталган.

Сот өкүмүндө Молдин социалдык түйүндөрдө «Казакстандын демократиялык тандоосунун» идеяларын пропагандалаганы, психологиялык-филологиялык экспертиза ага тагылган айыптоолордун негиздүү экенин ырастаганы жазылган.

Молдин быйыл 10-ноябрдан бери үй камагында болгон. 21-декабрда анын бөгөт чарасы өзгөртүлүп, белгилүү бир аймактан чыгуусуна тыюу салынды. Сот чечими күчүнө киргенден кийин активист пробациялык кызматтын уруксаты жок Актөбө облусунун аймагынан чыга албайт.

Тараптардын жарыш сөзүндө Алибек Молдин айыптоолорду четке кагып, күнөөсү жок экенин билдирген. Анын адвокаты Адил Тулкибаев активист тыюу салынган уюмдун мүчөсү экени далилденбегенин, ал «Казакстандын демократиялык тандоосу» кыймылынын жетекчилеринен эч кандай тапшырма албаганын белгиледи.

Молдин буга чейин бир нече жолу өкмөткө каршы акцияларга чыгып, уруксат берилбеген митингдерге катышуу айыбы менен административдик камактарга алынган.

Бозгунда жүргөн казакстандык саясатчы Мухтар Аблязов негиздеген «Казакстандын демократиялык тандоосу» кыймылынын ишмердүүлүгүнө 2018-жылы, «Көше партиясына» быйыл май айында тыюу салынган. Сот аларды «экстремисттик уюм» деп тапкан.

WWW