1,290 Бардыгы /

ОШ. Кыргызстандын Түштүк башкалаасында Президенттик шайлоого жана референдумга карата карата он төрт тергөө-талдоо тобу түзүлүп, милиция кызматкерлери күчөтүлгөн тартипте ишке киришти.

Ошентип, 8-январь күнү эртең мененки саат 08:00дөн тартып Ош шаардык ички иштер башкармалыгынын өздүк курамы калаанын бардык  аймагында жайгашкан 78 шайлоо тилкесинде коомдук коопсуздукту туруктуу камсыз кылуу үчүн бөлүнүштү. Булар шаардык шайлоо комиссиясынан алып келинген бюллетендерди дагы күнү-түнү кайтарышат. Андыктан, Ош шаардык ички иштер башкармалыгынын жетекчилиги өздүк курамга шайлоо өнөктүгү маалындагы милиция кызматкерлеринин укуктары менен милдеттери туурасында дагы бир ирет абдан катуу эскертишип, коомдук тартипти бекем сактоону, кандайдыр бир чагымчылык кадамдарга таптакыр жол бербөөнү, жарандарга сылык-сыпаа мамиле жасоону убадалашты. Ошол эле мезгилде коомдук коопсуздукту бузган жарандарга мыйзам чегинде кечеңдетпестен катаал чаралар көрүлмөкчү.

Ош шаардык ички иштер башкармалыгынын милиция кызматкерлери күчөтүлгөн тартипте кызмат өтөөнү башташты. Ар бир шайлоо тилкесине шайлоочулардын санына жараша бир нече милиция кызматкерлери бөлүнүштү. Буларга башка күч органдардын кызматкерлери, жергиликтүү бийлик өкүлдөрү, элдик кошундун мүчөлөрү, ички иштер органдарынын ардагерлери дагы түздөн-түз жардамдашышат. Ар бир кичи райондогу ал-акыбалды үзгүлтүксүз текшерип, тыкыр көзөмөлдөө максатында аталган башкармалыктын жетекчилик курамынан дагы жооптуу адамдар дайындалышты.

Алишер ТОКСОНБАЕВ “АЙМАК”