600 Бардыгы /

Мөөнөтүнөн мурда өтүп жаткан президенттик шайлоо айрым тилкелерде мыйзам бузуу менен коштолууда. Шайлоо жараянына мониторинг жүргүзүп жаткан «Жалпы иш» коомдук фонду ушундай билдирүү таратты. Уюм өлкө аймагындагы 500 шайлоо тилкесине көз салууда.

«Жалпы иш» коомдук фондунун адистери шайлоо тынч өтүп жатканын белгилешти. Бирок алар добуш берүү башталган саат 8:00дөн 13:00гө чейин 30 одоно мыйзам бузуу фактысын аныкташкан. Алар шайлоо тилкелери убагында ачылбаганына, байкоочулардын жана шайлоочулардын укуктары тебеленгенине, техниканын иштешине жана уюштуруу иштерине байланыштуу.

Фактылар боюнча жергиликтүү шайлоо участокторунун башчыларына, Борбордук шайлоо комиссиясына (БШК) арыз берилди.

Бул арада “Клооп” басылмасы алардын бир нече байкоочусу да мыйзам бузууларды аныктаганын жазды. Маалыматка караганда, Бишкектеги №1157 шайлоо тилкесинде кишилерди ташуу учуру катталган.

Бишкектеги №1117 шайлоо тилкесинде шайлоо комиссиясынын кызматкерлеринин бири улгайган аялга Садыр Жапаров үчүн добуш берүү керек экенин айткан.

Таластагы №6106 шайлоо тилкесинин байкоочусу тышта аялдар тобу турганын, машине менен ташылып келген аялдар ичкери кирер алдында аларга жолугуп кетип жатканын айткан. Тилкелик шайлоо комиссиясынын мүчөлөрү байкоочунун даттануусуна кулак төшөшкөн эмес.

№1117 шайлоо тилкесинде журналисттерге жана байкоочуларга сүрөт жана видео тартууга тыюу салынган.

WWW