654 Бардыгы /

Өзбекстанда Тажикстандагы Кайраккум суу сактагычында кырсык болуп, андан чыккан суу Сырдарыя облусунун аймагын каптай тургандыгы жөнүндө жалган маалымат тараткан бир нече киши кармалды.

Алардын бири жергиликтүү телеканалдагы сөзүндө бул маалыматты «Ютуб» сервисинен көрүп, эскертип коюу максатында жакындарына жөнөткөнүн айтты. Өз кезегинде туугандары аны башка адамдарга жөнөтүп, маалымат облустагы Мирзаабад жана Акалтын райондоруна жайылып кеткен. Мындан улам айрым тургундар үйлөрүн таштап качууга да үлгүрүшкөн.

Ага чейин облус жетекчилери менен Өзгөчө кырдаалдар министрлигинин өкүлдөрү жашоочуларды жалган маалымат таратпоого чакырышкан.

Ал ортодо жекшемби күнү Кайраккум ГЭСинин директору Файзулло Авазов он жылдан кийин электр станциясын реконструкциялоо боюнча план бекитилгенин билдирди. Анын айтымында, март айында баштала турган реконстркциянын алкагында ГЭСтин бардык алты гидроагрегаты, ошондой эле башка жабдуулары толук алмаштырылат. Оңдоо иштери 57 айга созулуп, 2023-жылга карата толугу менен бүткөрүлөт деп пландалууда.

Сырдарыя суусуна курулган Кайраккум ГЭСи Согди облусу үчүн электр энергиянын жалгыз булагы болуп эсептелет. Мындан тышкары анда Өзбекстан менен Казакстандын талаалары үчүн суу топтолот. Анын узундугу 55 чакырымды, эң терең жери 25 метрди түзөт. Жалпы кубаттуулугу 3,5 миллиард куб метрге жетет.

Расмий маалыматтарга караганда, европалык GE Renewable Energy компаниясы Кайраккум ГЭСин реконструкциялоого 150 миллион доллар бөлүп, бул боюнча 2019-жылы «Барки Точик» улуттук энергохолдинги менен келишим түзгөн. Ага ылайык, Тажикстан 50 миллион доллардан ашык каражатты грант, калганын узак мөөнөттүү жеңилдетилген насыя катары алат.

WWW