870 Бардыгы /

ОШ. Кыргызстандын Түштүк башкалаасында маңзат соодалаган аскер кызматкери кылтакка илинди. Бул жөнүндө Ички иштер министрлигине караштуу Маңзатты мыйзамсыз жүгүртүүгө каршы күрөшүү кызматынан кабарлашты.  

• Ыкчам иликтөө иш-чаралары Ош шаарынын бир нече даректеринде

үзгүтүксүз жүргүзүлдү. Акырында аскер бөлүктөрүнүн биринин кызматкери маңзаттарын таратуучу туруктуу канал уюштургандыгы аныкталды. Натыйжада Кыргызстандын Түштүк башкалаасында 30 жаштагы А. уулу Н. аттуу аскер кызматкери 27-январь күнү өсүмдүк тобундагы маңзатты соодалап жаткан маалда колго түшүрүлдү. Адепки соттук-химиялык экспертизанын корутундусуна ылайык, алынган маңзат 7 граммды түзгөн гашиш экендиги тастыкталды, – дейт Ички иштер министрлигине караштуу Маңзатты мыйзамсыз жүгүртүүгө каршы күрөшүү кызматынын өкүлү.  

Ошондой эле кармалган адамдын Ош жана Чүй облустарында, мунун ичинде жазык-аткаруу тутумунун мекемелеринде (түрмөлөрдө) жазасын өтөп жатышкан соттолгондордун арасында  дагы маңзаттарды таратууга катыштыгы бар экендиги аныкталды. Ушул тапта сотко чейинки иликтөө иштери жүргүзүлүп, бул  кылмышка тиешеси бар башка адамдар дагы тастыкталып жатат.

Алишер ТОКСОНБАЕВ “АЙМАК”