744 Бардыгы /

АКШнын мурдагы президенти Дональд Трампка импичмент жарыялоо жараянына айыптоочу катары катышып жаткан Конгресстин Өкүлдөр палатасынын мүчөлөрү менен экс-президенттин адвокаттары процесстеги болжолдуу позициялары көрсөтүлгөн юридикалык кагаздарды Сенатка тапшырып беришти.

Трампка импичмент жарыялоо жараяны АКШ Сенатында 9-январда башталышы керек.

Айыптоо документинде Дональд Трамп 6-январда тарапташтарынын Конгресстин имаратын басып алышына шыкакчы болгону жазылган.

Буга чейин Трампка импичмент жарыялаган Өкүлдөр палатасынын мүчөлөрү ал тарапташтарын «Конгресске барууга чакыруу менен» президенттик антты бузуп, демократиялык системаны алсыратууга аракет кылган деп эсептешүүдө.

Өз кезегинде Трамптын адвокаттары экс-президент шайлоо жыйынтыктарын бекитүү боюнча Конгресстин жыйынын үзгүлтүккө учуратууну каалабаганын, митингде добуш берүүнүн жыйынтыктары бурмаланганы жөнүндө айтуу — анын сөз эркиндигине болгон конституциялык укугу экенин билдиришүүдө.

Өкүлдөр палатасы Дональд Трампка 13-январда импичмент жарыялаган. Бирок президентти бийликтен четтетүү тууралуу акыркы чечим Сенаттагы соттон кийин Конгресстин жогорку палатасында кабыл алынышы керек. Бул үчүн импичмент демилгесин сенаторлордун үчтөн экиси колдошу зарыл. Буга чейин республикачы-сенаторлордун көбү мурдагы президенттин үстүнөн жүрүп жаткан сот өлкө Конституциясына каршы келээрин билдиришкен.

WWW