816 Бардыгы /

ОШ. 2021-жылдын 13-январында Кара-Кулжа райондук ички иштер бөлүмүнүн (РИИБсынын) кызматкерлерине ок атуучу курал менен капысынан кол салган жаран акырында Ош облустук ички иштер башкармалыгынын жана Кара-Кулжа райондук ички иштер бөлүмүнүн кызматкерлери тарабынан тынымсыз жүргүзүлгөн ыкчам иш-чаралардын натыйжасында гана кармалды. 

Маалыматка караганда, аталган окуя боюнча Кара-Кулжа РИИБдин маалыматтарды каттоо журналына катталып, Кыргыз Республикасынын Жаза Кодексинин 39-130-беренеси менен Кара-Кулжа РИИБдин кылмыштардын жана жоруктардын бирдиктүү реестрине  каттоого алынып,  сотко чейинки өндүрүш ачылып, кылмыштын бетин ачуу боюнча тажрыйбалуу кызматкерлерден турган ыкчам-тергөө тобу түзүлгөн эле. Ошентип, кармалган кылмышка шектүү жаран Кара-Кулжа районунун Биринчи-Май айылынын тургуну 46 жаштагы У.А. тергөө кызматына  алынып келинди.

         Алгачкы эле иликтөөлөрдүн жүрүшүндө кылмышка шектүү жаран аталган кылмышты жасагандыгын моюндап, көп жыл мурда милиция кызматкерлери менен жеке пикир келишпестиги болгон учурду эстеп, өзү мыйзамсыз алып жүргөн ок атуучу куралын алып келип, түн караңгыда кызматкерлерди атып жибергендигин дароо моюндады.

         Айтмакчы, шектелүүчү аталган окуядан соң дароо үйүнө кайтып келип, такай кийип жүргөн кийимин жана мылтыктын кундагын үйүндөгү мештеги отко жагып жиберген дагы жана мылтыктын найын (стволун) үйүнүн короосуна кире беришиде орнотулган дарбазанын түтүгүнө салып таштаган. Кара-Кулжа РИИБдин кызматкерлери тарабынан далилзат – буюмду алуу максатында дарбазынын түтүктөрү дыкаат текшерилип, андагы жашырылган мылтыктын стволу табылды. Дарбазанын түтүгүн кесип мылтыктын стволу далил-буюм катары экспертиза кызматына өткөрүлүп берилди. Учшул тапта Кара-Кулжа РИИБсынын кызматкерлери тарабынан сотко чейинки өндүрүш иш-чаралары жүргүзүлүүдө.

Алишер ТОКСОНБАЕВ “АЙМАК”